Թուրքիան արձագանքել է Սիրիայում քուրդ-ամերիկյան զորավարժություններին

Քաղաքական10:36, 25 Օգոստոս 2023

Թուրքիան արձագանքել է Սիրիայում քուրդ-ամերիկյան զորավարժություններին

Թուրքիայի պաշտպանության նախարարությունը հայտարարություն է տարածել իրենց կողմից ահաբեկչական ճանաչված «Քուրդիստանի բանվորական կուսակցության» (ՔԲԿ-PKK), «Սիրիայի քրդական ինքնապաշտպանական ուժերի» (YPG) և ԱՄՆ զինված ուժերի միջև Սիրիայի Ղամըշլը շրջանում իրականացված համատեղ զորավարժության վերբերյալ:

Հայտարարության մեջ մասնավորապես ասվում է. «ԱՄՆ-ն ԻԼԻՊ-ի («Իրաքի և Լևանտի իսլամական պետություն», ԱՄՆ կողմից ճանաչված է ահաբեկչական կազմակերպություն) դեմ պայքարի պատրվակով շարունակում է աջակցել PKK-ին և YPG-ին: Անկարելի է պայքարել մի ահաբեկչական կազմակերպության դեմ` օգտագործելով մեկ ուրիշ ահաբեկչական կազմակերպություն»:

Բացի այդ հայտարարության մեջ նշվել է բարեկամ երկրներից և դաշնակիցներից Թուրքիայի ունեցած ակնկալիքների մասին:

«Դադարեցնել PKK-ին և YPG-ին տրամադրվող աջակցությունն ու օգնությունը և անկեղծորեն աջակցել Թուրքիային ահաբեկչության դեմ պայքարում»:

Հիշեցնենք, որ թուրքական մամուլում վերոհիշյալ զորավարժության վերաբերյալ տեղեկությունները տարածվել էին օգոստոսի 18-ին: