Իսրայելը Թուրքիայից Գազա ուղարկված կոնտեյներներում հայտնաբերել է հրթիռների պատրաստման նյութեր

Ռազմական17:02, 15 Սեպտեմբեր 2023

Իսրայելը Թուրքիայից Գազա ուղարկված կոնտեյներներում հայտնաբերել է հրթիռների պատրաստման նյութեր

Սեպտեմբերի 14-ին Իսրայելը հայտարարել է, որ Թուրքիայից Գազայի շրջան մատակարարվող կոնտեյներներում հայտնաբերել է հրթիռներ պատրաստելու համար նախատեսված նյութեր։

Մասնավորապես նշվում է, որ Իսրայելի մաքսային վարչությունը զննություն է անցկացրել Թուրքիայից Գազա ուղարկվող 2 կոնտեյներում, որոնցում պետք է լիներ 54 տոննա գիպս։

Իսկ հետո մի քանի նմուշ ուղարկել է լաբորատորիա հետազոտության, ինչի արդյունքում էլ պարզվել է նման նյութերի պարունակությունը։

Հայտարարության իսկությունը շտապել է հերքել Գազայի շրջանում իշխող պաղեստինյան ՀԱՄԱՍ շարժումը՝ այն որակելով «մտացածին»։

ՀԱՄԱՍ-ի խոսնակ Հազըմ Քասըմն էլ բրիտանական «Reuters» միջազգային լրատվական գործակալության հետ զրույցում ասել է․ «Օկուպանտ ուժը Գազայի շրջափակումը խորացնելու նպատակով սուտ է տարածում»։

Նշենք, որ Գազան աշխարհում ամենից խիտ բնակեցված վայրերից մեկն է, որտեղ ապրում է շուրջ 2․3 մլն պաղեստինցի։

Գազայի շրջանը ՀԱՄԱՍ-ի իշխանության տակ է անցել 2007-ին, ինչից հետո էլ Իսրայելը Եգիպտոսի հետ միասին «շրջափակման» մեջ է առել շրջանի տնտեսությունը, քանի որ շարժումը Իսրայելի կողմից ճանաչված է ահաբեկչական։

Սեպտեմբերի սկզբին Իսրայելը պայթուցիկ նյութերի անօրինական տեղափոխման փորձեր կատարելու պնդմամբ՝ մի քանի օր դադարեցրել էր Գազայից ապրանքների արտահանումը։

Աղբյուր` rudaw.net