Թուրքիայի խորհրդարանի նախագահն ընդունել է Անկարայում ՌԴ դեսպանին

Քաղաքական09:54, 16 Նոյեմբեր 2023

Թուրքիայի խորհրդարանի նախագահն ընդունել է Անկարայում ՌԴ դեսպանին

Նոյեմբերի 15-ին Թուրքիայի խորհրդարանի նախագահ Նուման Քուրթուլմուշն ընդունել է Անկարայում Ռուսաստանի դեսպան Ալեքսեյ Յերհովին։

Հանդիպման ընթացքում քննարկվել են Ռուսաստան-Թուրքիա երկկողմ հարաբերությունները, ինչպես նաև անդրադարձ է կատարվել պաղեստինա-իսրայելական հակամարտությանը:

Քուրթուլմուշն աշխարհում ընթացող հակամարտությունների ֆոնին կարևորել է երկու պետությունների միջև առկա համագործակությունն ու դրանց խորացումը բոլոր ոլորտներում:

Թուրքիայի խորհրդարանի նախագահն ընդգծել է նաև հակամարտությունների՝ տարածաշրջանային պետությունների ներգրավվածությամբ բանակցության ճանապարհով լուծելու անհրաժեշտությունը և նշել, որ արտատարածաշրջանային պետությունների ներգրավվածությունը դրանցում միայն բարդացնում է խնդիրները:

Բացի այդ, Քուրթուլմուշը ցանկություն է հայտնել այցելել ՌԴ խորհրդարան, ըստ նրա՝ միջխորհրդարանական կապերը լավագույն կետ տեղափոխելն ընդհանուր ձեռքբերում կլինի Թուրքիա-ՌԴ հարաբերությունների մակարդակի բարձրացման տեսանկյունից:

Ռուս դեսպանն էլ, անդրադառնալով պաղեստինա-իսրայելական հակամարտությանը, նշել է, որ Ռուսաստանն այդ հարցում կիսում է Թուրքիայի տեսակետը:

Նշենք, որ Թուրքիան որպես հակամարտության լուծում տեսնում է երկու անկախ պետությունների ձևավորման մոդելը:

Աղբյուր` trthaber.com