Թուրքական մամուլը Հունաստանին մեղադրում է սադրանք հրահրելու մեջ

Քաղաքական11:55, 29 Նոյեմբեր 2023

Թուրքական մամուլը Հունաստանին մեղադրում է սադրանք հրահրելու մեջ

Թուրքական մամուլում լայն շրջանառություն է ստացել օրերս Հունաստանի արտգործնախարար Գիորգոս Գերապետրիտիսի հայտարարությունը` կապված Էգեյան ծովում գտնվող Լադոխերա (թուրք. Զուռաֆա) կղզու հետ:

Գերապետրիտիսը մասնավորապես նշել է, որ վերոհիշյալ կղզին հունական է, ինչն էլ թուրքական մեդիայում վրդովմունքի մեծ ալիք է առաջացրել:

Թուրքիայի ցամաքային սահմանից 15 մղոն հեռավորության վրա գտնվող այդ կղզու վերաբերյալ այդօրինակ հայտարարությունը թուրքական մեդիայում որակվել է որպես Հունաստանի կողմից իրականացվող նոր սադրանք:

Ավելի վաղ Հունաստանի արտաքին քաղաքական գերատեսչության ղեկավարի հայտարարությանն արձագանքել էր Թուրքիայի իշխանամետ «Նոր բարօրություն» կուսակցության (Yeniden Refah Partisi) Ստամբուլի պատգամավոր Դողան Բեքինը:

«Էգեյան ծովում գտնվող Զուռաֆա կղզին Թուրքիային պատկանող տարածք է: Հունաստանի արտգործնախարարը սանձարձակ հայտարարություն է արել: Հունաստանն ինչպես մյուս 20 կղզիները, այս կղզին ևս փորձում է դասել եղած-ավարտված հարցերի շարքին»,- ասել է նա:

Նշենք, որ Թուրքիայի և Հունաստանի միջև առաջին անգամը չէ ինչ-որ կղզու հետ կապված տարաձայնություն առաջանում: Նման կղզիները թվով 21-ն են, Զուռաֆան և Կիպրոսը ներառյալ:

Աղբյուր` sozcu.com.tr