Թուրքիան և Ճապոնիան կհամագործակցեն Գազա հումանիտար բեռներ հասցնելու հարցում

Քաղաքական10:32, 17 Հունվար 2024

Թուրքիան և Ճապոնիան կհամագործակցեն Գազա հումանիտար բեռներ հասցնելու հարցում

Թուրքիայի արտգործնախարար Հաքան Ֆիդանը Անկարայում հանդիպել է ճապոնացի իր գործընկերոջ՝ Կամիկավա Յոկոյի հետ:

Արտգործնախարարության շենքում տեղի ունեցած հանդիպումից հետո կողմերը համատեղ մամուլի ասուլիս են տվել:

Ֆիդանը նշել է, որ Յոկոյի հետ անդրադարձել են Գազայի հարցի շուրջ երկու երկրների միջև առկա համագործակցությանը վերաբերող հարցերի:

«Այս ուղղությամբ երկկողմ, ինչպես նաև ՄԱԿ-ի բազմակողմանի հարթակներում ունեցած մեր համագործակցությունը շարունակելու ենք: Բացի այդ, նրանց հետ որոշում ենք կայացրել համագործակցել Գազա հումանիտար բեռներ հասցնելու հարցում»,-ասել է նա:

Ֆիդանը նաև իր ցավակցությունն է հայտնել 2024-ի տարեսկզբին հարյուրավոր մարդկանց մահվան պատճառ հանդիսացած երկրաշարժի և Տոկիոյի «Հանեդա» օդանավակայանում տեղի ունեցած վթարի կապակցությամբ:

Թուրքիայի արտաքին քաղաքական գերատեսչության ղեկավարը անդրադարձել է նաև թուրք-ճապոնական գիտության և տեխնոլոգիաների համալսարանի գործարկմանը: Ըստ այդմ՝ համալսարանը կգործարկվի 2024-ի ընթացքում:

Նա նաև համոզմունք է հայտնել, որ համալսարանը երկու երկների համագործակցությունն ավելի բազմաոլորտային դարձնելու հնարավորություն է ապահովելու:

Աղբյուր` trthaber.com