Թուրքական մեդիայում շրջանառվում է ԱՄՆ-ում Թուրքիայի նոր դեսպանի անունը

Քաղաքական13:43, 22 Փետրվար 2024

Թուրքական մեդիայում շրջանառվում է ԱՄՆ-ում Թուրքիայի նոր դեսպանի անունը

Թուրքական մեդիայում դիվանագիտական աղբյուրների տեղեկությունների վրա հիմնվելով՝ նշվում է, որ Վաշինգտոնում Թուրքիայի դեսպան է նշանակվելու ՄԱԿ-ում Թուրքիայի մշտական ներկայացուցիչ Սեդաթ Օնալը:

Ինչպես նաև այս պարագայում փոխվելու է ՄԱԿ-ում Թուրքիայի մշտական ներկայացուցիչը:

Այդ պաշտոնը զբաղեցնելու է փոխարտգործնախարար, արտակարգ և լիազոր դեսպան Ահմեդ Յըլդըզը։

Ըստ թուրքական պետական «Anadolu» լրատվական գործակալության` այդ մասին նրանց զանգահարել և հայտնել է արտգործնախարար Հաքան Ֆիդանը։

Հիշեցնենք, որ ԱՄՆ-ում Թուրքիայի դեսպան Մուրադ Մերջանը սոցցանցում արած գրառմամբ հունվարի 8-ին տեղեկացրել էր, որ հունվարի 12-ին լքելու էր իր պաշտոնը:

Որպես պատճառ Մերջանը նշել էր իր տարիքը՝ նա հունվարի 14-ից կենսաթոշակառուի կարգավիճակ էր ստանալու:

Թուրքական մամուլում շրջանառվում էին տեղեկություններ, որոնց համաձայն՝ Թուրքիան իր նոր ներկայացուցչին ԱՄՆ-ում Թուրքիայի դեսպանի պատշոնում հաստատելու համար դիմում էր ուղարկել ԱՄՆ և սպասում էր պատասխանի:

ԱՄՆ-ում Թուրքիայի նոր դեսպանի մասին անձնական տվյալներ չէին հաղորդվում:

Մերջանն ԱՄՆ-ում Թուրքիայի դեսպանի պաշտոնին նշանակվել էր 2021-ի մարտին:

Աղբյուր` aa.com.tr