Թուրքական արտահանման ծավալների մեջ 1-ին տեղում Գերմանիան է

Տնտեսական17:18, 28 Փետրվար 2024

Թուրքական արտահանման ծավալների մեջ 1-ին տեղում Գերմանիան է

Թուրքիայի վիճակագրական ինստիտուտը (TÜİK) տվյալներ է հրապարակել 2024-ի հունվարին Թուրքիայի արտաքին առևտրի վերաբերյալ:

Նշվում է, որ 2024-ի հունվարին գրանցված արտաքին առևտրի հաշվեկշռի դեֆիցիտը (պակասուրդ) 2023-ի նույն ժամանակահատվածի համեմատ կրճատվել է ավելի քան 56 տոկոսով՝ 14 մլրդ 290 մլն-ից նվազելով 6.23 մլրդ դոլարի:

Իսկ նույն ժամանակահատվածում իրականացված արտահանումների ծավալը 2023-ի հունվարի համեմատ աճել է 3.5 տոկոսով՝ հասնելով 19 մլրդ 991 մլն-ի:

Տարբերություն է գրանցվել նաև ներկրման մասով. 2024-ի հունվարին ներկրվել է 26 մլրդ 218 մլն դոլարին համարժեք ապրանք, որը 2023-ի նույն ժամանակահատվածի համեմատ քիչ է 22 տոկոսով:

Ըստ հրապարակված տվյալների՝ Թուրքիան ամենից շատ արտահանում է իրականացրել Գերմանիա: Արտահանումների ծավալը կազմել է 1 մլրդ 762 մլն դոլար:

Երկրորդ երկիրը, ուր Թուրքիան իրականացրել է ամենից շատ արտահանումները, ԱՄՆ-ն է: Դրանց ծավալները կազմել են 1 մլրդ 224 մլն դոլար:

Իսկ այն երկիրը, որից Թուրքիան ամենից շատն է ներկրում իրականացրել, եղել է Ռուսաստանը: Ներկրված ապրանքների ընդհանուր ծավալը կազմել է 4 մլրդ 324 մլն դոլար:

Երկրորդ տեղը զբաղեցրել է Չինաստանը: Այնտեղից Թուրքիա արտահանված ապրանքների ծավալը եղել է 2 մլրդ 893 մլն դոլար:

Աղբյուր` dw.com.tr