Մեկ տարի է, ինչ կասեցված է Իրաքյան Քուրդիստանից նավթի արտահանումը Թուրքիա

Տնտեսական14:49, 25 Մարտ 2024

Մեկ տարի է, ինչ կասեցված է Իրաքյան Քուրդիստանից նավթի արտահանումը Թուրքիա

Իրաքի և Իրաքյան Քուրդիստանի միջև առկա անհամաձայնությունների պատճառով արդեն 1 տարի է ինչ կասեցվել է Քիրքուք-Ջեյհան նավթամուղով Թուրքիա իրականացվող նավթի արտահանումը:

Թուրքական մեդիայում նշվում է, որ ստեղծված իրավիճակի պատճառով նավթամուղի բոլոր շահառուները կորցնում են ֆինանսական մեծ եկամտաբերություն ունենալու իրենց հնարավորությունները։

Իրաքյան Քուրդիստանի նավթարդյունաբերական միության խոսնակ Մայլես Քագինսը, անդրադառնալով Իրաքի Վարչապետ Մուհամմեդ Շայա ալ-Սուդանիի ԱՄՆ պլանավորվող այցին, ասել է.

«Սուդանիի վաշինգտոնյան այցն ամենալավ հնարավորությունն է նավթի արտահանման վերագործարկման հետ կապված որոշում կայացնելու համար: Սակայն Իրաքում կան հարևան երկրին պատկանող որոշ ուժեր, որոնք ազդում են Բաղդադի և դաշնային դատարանի քաղաքականության վրա»:

Չնայած այն բանին, որ Իրաքյան Քուրդիստանից նավթի արտահանումը դեպի Թուրքիա մնում է կասեցված, Թուրքիայի էներգետիկայի և բնական հանածոների նախարար Ալփարսլան Բայրաքթարը 2023-ի նոյեմբերի 1 արած հայտարարությամբ հայտնել էր, որ իրենք պատրաստակամ են 2023-ի հոկտեմբերից վերսկսել նավթի արտահանումը:

Ապա նաև նշել, որ այդ գործընթացն ապահովելու համար տեխնիկական խնդիր չկա, սակայն Էրբիլի և Բաղդադի միջև այդ հարցում առկա անհամաձայնությունների պատճառով նավթի արտահանումը դեռևս չի վերսկսում:

Հիշեցնենք, որ Միջազգային արբիտրաժային դատարանը Թուրքիային պարտավորեցրել էր 1․5 մլրդ դոլարի փոխհատուցում վճարել Իրաքին՝ այն բանի համար, որ Հյուսիսային Իրաքի ինքնավար քրդական շրջանի ղեկավարությանը թույլ էր տվել նավթ արտահանել առանց Իրաքի կենտրոնական կառավարության համաձայնության։

Դատարանը պարտավորցրել էր նաև 2023-ի մարտի 23-ից դադարեցնել Թուրքիա նավթի արտահանումը, որը սակայն Իրաքյան Քուրդսիտանի կողմից կատարվել էր 2023-ի մարտի 25-ին:

Աղբյուր` gazetoksijen.com