Թուրքիայի խորհրդարանի նախագահը Բաքվում է

Քաղաքական11:02, 06 Հունիս 2024

Թուրքիայի խորհրդարանի նախագահը Բաքվում է

Թուրքիայի խորհրդարանի նախագահ Նուման Քուրթուլմուշը մեկնել է Ադրբեջան: Նրա այցը պայմանավորված է Բաքվում «Թյուրքական պետությունների խորհրդարանների վեհաժողովի» (TÜRKPA) գլխավոր խորհրդի 13-րդ նիստի անցկացմամբ:

Քուրթուլմուշին Ադրբեջանի ներկայիս նախագահ Իլհամ Ալիևի հոր՝ Հեյդար Ալիևի անվան միջազգային օդանավակայանում դիմավորել են Ադրբեջանի խորհրդարանի փոխնախագահ Ֆեզայիլ Իբրահիմլին, Բաքվում Թուրքիայի դեսպան Ջահիթ Բաղջըն, Ադրբեջան-Թուրքիա միջխորհրդարանական բարեկամական խմբի նախագահ Էհլման Էմիրասլանովը և այլ պաշտոնյաներ:

Թուրքիայի խորհրդարանի նախագահի հետ Ադրբեջան են մեկնել նաև իշխող «Արդարություն և զարգացում կուսակցության» (AKP-ԱԶԿ) հետ դաշինքի մեջ գտնվող «Ազգայնական շարժում կուսակցության» (ԱՇԿ-MHP) խորհրդարանականների նախագահի պաշտոնակատար Ֆիլիզ Քըլըչը, Թուրքիա-Ադրբեջան միջխորհրդարանական բարեկամական խմբի նախագահ և ԱԶԿ-ի Ստամբուլի պատգամավոր Շամլի Այրըմը, Էլազըղի ԱԶԿ-ական պատգամավոր Մահմուդ Ռըդվան Նազըրլըն, Թուրքիայում գլլխավոր ընդդիմադիր ուժ համարվող «Ժողովրդահանրապետական կուսակցության» (ԺՀԿ-CHP) Քոջաէլիի պատգամավոր Հարուն Օզգյուր Յըլդըզլըն, Թոքաթի ԺՀԿ-ական պատգամավոր Քադիմ Դուրմազը և Թուրքիայի խորհրդարանի գլխավոր քարտուղար Թալիթ Ուզունը:

Նշվում է, որ «TÜRKPA»-ի գլխավոր խորհրդի 13-րդ նիստն անցկացվում է «Թյուրքական աշխարհի համար կանաչ հորիզոններ. կանաչ օրակարգի իրականացման հարցում խորհրդարանի ունեցած դերը» խորագրով:

Նիստից հետո տեղի է ունենալու հանդիպում Ադրբեջանի նախագահ Իլհամ Ալիևի և մասնակից պետությունների խորհրդարանի նախագահների միջև:

Աղբյուրի համաձայն՝ Քութուլմուշն ամփոփելու է 2023-ի ապրիլի 28-ից ի վեր ստանձնած «TÜRKPA»-ի նախագահության շրջանը և այն փոխանցելու է Ադրբեջանի խորհրդարանի նախագահ Սահիբե Գաֆարովային:

Աղբյուր` trthaber.com