Հանդիպել են Հայաստանի և Թուրքիայի խորհրդարանի նախագահները

Քաղաքական09:34, 15 Հոկտեմբեր 2024

Հանդիպել են Հայաստանի և Թուրքիայի խորհրդարանի նախագահները

Հոկտեմբերի 14-ին Ժնևի միջազգային կոնֆերանս կենտրոնում «Միջխորհրդարանական միության 149-րդ վեհաժողովի» շրջանակներում հանդիպել են Հայաստանի և Թուրքիայի խորհրդարանի նախագահներ Ալեն Սիմոնյանը և Նուման Քուրթուլմուշը:

Թուրքական կողմի տարածած հայտարարության համաձայն՝ Քուրթուլմուշն ասել է, որ Թուրքիան և Հայաստանը բարդ աշխարհագրությունում են ապրում և որ տարածաշրջանում ու աշխարհում տեղի ունեցող ցնցումներն այս աշխարհագրության ժողովուրդներին ստիպում են միասին գործել ու ապրել խաղաղության մեջ։

Քուրթուլմուշը նշել է, որ Թուրքիան վերջին շրջանում առաջնահերթություն է տալիս լարվածությունների նվազեցմանը և երկկողմ հարաբերությունների կարգավորմանը, ինչպես նաև շեշտել է, որ այն աշխարհագրությունում, որտեղ գտնվում են Թուրքիան ու Հայաստանը, ամեն տեսակ համագործակցություն լինելու է՝ ի շահ ժողովուրդների։

Քուրթուլմուշն ընգծել է, որ անհրաժեշտ է ակտիվ պահել տարածաշրջանի երկրների միջև երկխոսությունը: Նրա կարծիքով, Թուրքիան և Հայաստանը հանգիստ կարող են խոսել տարածաշրջանային թեմաների մասին։

Թուրք պաշտոնյան նշել է նաև, որ երկու երկրների միջև հարաբերությունների կարգավորման պարագայում, որն իրականացվելու է «Հաղթում են երկու կողմերն էլ» (win-win) սկզբունքով, կողմերից յուրաքանչյուրը շահելու է:

Աղբյուր` Tbmm.gov.tr