Թուրքիան Անկարայի ահաբեկչությունից հետո ռազմաօդային գործողություն է իրականացրել Իրաքում և Սիրիայում

Ռազմական08:34, 24 Հոկտեմբեր 2024

Թուրքիան Անկարայի ահաբեկչությունից հետո ռազմաօդային գործողություն է իրականացրել Իրաքում և Սիրիայում

Հոկտեմբերի 23-ին Թուրքիայի պաշտպանության նախարարությունը հայտարարել է Իրաքի և Սիրիայի հյուսիսային հատվածներում ռազմաօդային գործողություն իրականացնելու մասին:

Նշվել է, որ գործողությունը միտված է եղել իրենց կողմից ահաբեկչական համարվող «Քուրդիստանի բանվորական կուսակցության» (PKK-ՔԲԿ) դեմ:

Գործողության արդյունքում խոցվել է 32 թիրախ և սպանվել մեծ թվով զինյալներ:

Հաղորդագրության մեջ ընդգծվել է, որ Թուրքիայի ռազմական գերատեսչությունը շարունակելու է նմանատիպ գործողությունները՝ մինչև «վերջին ահաբեկչի վնասազերծումը»:

Հիշեցնենք, որ ռազմագործողությունը հաջորդել է նույն օրը Թուրքիայի օդատիեզերական ռազմարդյունաբերությամբ զբաղվող պետական «TUSAŞ» ընկերության Անկարայում գտնվող շենքի մոտ տեղի ունեցած ահաբեկչությանը, ինչի իրականացման մեջ թուրքական իշխանությունները մեղադրում են հենց «ՔԲԿ»-ին:

Ահաբեկչության հետևանքով մահացածների թիվը 5-ն է: Կա 22 վիրավոր:

Տեղի ունեցածը դատապարտել էր նաև Հայաստանի Հանրապետության ԱԳՆ-ն:

Աղբյուր` Trthaber.com