ERMENI HABER AJANSI

Թուրքիայի նախագահ Ռեջեփ Թայիփ Էրդողանը, ՌԴ-ում անցկացված «BRICS»-ի գագաթնաժողովից վերադառնալուց հետո, անվտանգության նիստ է անցկացրել։ 

Նիստին մասնակցել է Թուրքիայի փոխնախագահ Ջևդեթ Յըլմազը, արտգործնախարար Հաքան Ֆիդանը, ՊՆ ղեկավար Յաշար Գյուլերը, ներքին գործերի նախարար Ալի Յերլիքայան, գլխավոր շտաբի պետ Մեթին Գյուրաքը, «Ազգային հետախուզության ծառայության» (MİT) ղեկավար Իբրահիմ Քալընը, նախագահականի հանրային կապերի վարչության նախագահ Ֆահրեթթին Ալթունը, նախագահականի ռազմարդյունաբերության նախագահ Հալուք Գյորգյունը, նախագահի արտաքին քաղաքականության և անվտանգության հարցերով գլխավոր խորհրդական Աքիֆ Չաղաթայ Քըլըչը և իշխող «Արդարություն և զարգացում կուսակցության» (ԱԶԿ-AKP) փոխնախագահ ու խոսնակ Օմեր Չելիքը։

Նշվում է, որ նիստի օրակարգում է եղել հոկտեմբերի 23-ին օդատիեզերական թուրքական «TUŞAS» ընկերության վրա տեղի ունեցած ահաբեկչությունը, որի կազմակերպման մեջ թուրքական իշխանությունները մեղադրում են իրենց կողմից ահաբեկչական ճանաչված «Քուրդիստանի բանվորական կուսակցությանը» (ՔԲԿ-PKK)։

Հիշեցնենք, որ Անկարայում տեղի ունեցած ահաբեկչության հետևանքով մահացել է 5, վիրավորվել 22 մարդ։