Էրդողանի նախկին խորհրդական․ «Թուրքիան կարող է բախվել ԱՄՆ-ի և Իսրայելի հետ»

Քաղաքական14:23, 20 Հունվար 2025

Էրդողանի նախկին խորհրդական․ «Թուրքիան կարող է բախվել ԱՄՆ-ի և Իսրայելի հետ»

Թուրքիայի նախագահ Ռեջեփ Թայիփ Էրդողանի նախկին խորհրդական և «Յենի Շաֆաք»-ի սյունակագիր Այդըն Ունալը պնդել է, որ եթե «Սիրիայի քրդական ինքնապաշտպանական ուժեր»-ը (YPG) հրաժարվի զինաթափվել Աբդուլլահ Օջալանի հնարավոր կոչից հետո, Թուրքիան կարող է հայտնվել այնպիսի իրավիճակում, երբ ստիպված կլինի բախվել ոչ միայն YPG-ի, այլ նաև Իսրայելի և ԱՄՆ-ի հետ:

«Պատերազմ, խաղաղություն թե աղետ» վերնագրով իր հոդվածում Ունալն ընդգծել է, որ «Սիրիայի քրդական ինքնապաշտպանական ուժեր»-ի (YPG) և «Քուրդստանի բանվորական» կուսակցության (ՔԲԿ-PKK) շարունակական ներկայությունը սպառնում է Թուրքիայի հեղինակությանը և տարածաշրջանային կայունությանը: Նա առաջարկել է երկու լուծում՝ զինաթափում սիրիական վերահսկողության ներքո կամ ռազմական միջամտություն: Ցանկացած այլընտրանք, ինչպիսին է YPG-ին տարածաշրջանային կարգավիճակ շնորհելը, աղետալի կլինի Թուրքիայի համար:

Ունալը զգուշացրել է, որ իրավիճակը կարող է հանգեցնել ներքին քաղաքական անկայունության և վնասել Թուրքիայի միջազգային դիրքերին՝ ընդգծելով ազգային շահերը պաշտպանելու համար վճռական գործողությունների անհրաժեշտությունը:

Աղբյուր` www.odatv.com