Թուրքիան ընտրվել է ՄԱԿ տնտեսական և սոցիալական խորհրդի անդամ

Քաղաքական16:15, 05 Հունիս 2025

Թուրքիան ընտրվել է ՄԱԿ տնտեսական և սոցիալական խորհրդի անդամ

Թուրքիան ընտրվել է ՄԱԿ տնտեսական և սոցիալական խորհրդի (ECOSOC) անդամ 2026-2028թթ․ ժամանակահատվածի համար։

ՄԱԿ-ում Թուրքիայի մշտական ներկայացուցիչ Ահմեթ Յըլդըզը X միկրոբլոգում կատարած գրառմամբ տեղեկացրել է ընտրության արդյունքների մասին և շնորհակալություն հայտնել անդամ պետություններին իրենց աջակցելու համար։

Նա նաև շնորհավորելով մյուս ընտրված երկրներին, գրել է․ «Մենք անհամբերությամբ սպասում ենք աշխատել միասին՝ գլոբալ զարգացման օրակարգը առաջ մղելու համար»։

Ըստ քվեարկության արդյունքների՝ «Արևմտյան Եվրոպա և այլ պետություններ» տարածաշրջանից Թուրքիան ստացել է 174 ձայն և ընտրվել է Ավստրալիայի, Ֆինլանդիայի և Նորվեգիայի հետ միասին։

Ընդհանուր առմամբ, ECOSOC-ի անդամ են դարձել 18 երկիր՝ ներառյալ՝ Աֆրիկայից՝ 4, Ասիա-Խաղաղօվկիանոսյան տարածաշրջանից՝ 4, Արևելյան Եվրոպայից՝ 3, Լատինական Ամերիկայից և Կարիբյան տարածաշրջանից՝ 3 երկիր։

Նորընտիր անդամները պաշտոնը կստանձնեն 2026 թվականի հունվարի 1-ից։

Աղբյուր` Trthaber