Սիրիայի նախագահ. «Առանց ԱՄՆ-ի և Թուրքիայի միջնորդության ռեգիոնը կլիներ պատերազմի եզրին»

Տարածաշրջան11:38, 17 Հուլիս 2025

Սիրիայի նախագահ. «Առանց ԱՄՆ-ի և Թուրքիայի միջնորդության ռեգիոնը կլիներ պատերազմի եզրին»

Սիրիայի անցումային շրջանի նախագահ Ահմեդ ալ-Շարան խոսել է Իսրայելի կողմից Դամասկոսի վրա իրականացրած օդային հարձակումներից։ Շարան մասնավորապես մեղադրել է Իսրայելին Սիրիայի կայունությունը թիրախավորելու մեջ և ընդգծել, որ այդ երկիրը ցանկանում է Սիրիայի տարածքը ներքաշել քաոսի մեջ։

«Սիրիան օտարերկրյա դավադրությունների փորձարկման դաշտ չէ և չի կարող լինել մի վայր, որտեղ ուրիշներն իրականացնեն իրենց նկրտումները մեր երեխաների և կանանց հաշվին»,- հայտնել է Սիրիայի նախագահը։

Անդրադառնալով ԱՄՆ-ի և Թուրքիայի միջնորդությանը՝ Ահմեդ ալ-Շարան ընդգծել է, որ առանց նրանց միջնորդության տարածաշրջանը կլիներ խոշոր պատերազմի եզրին։

Ըստ Սիրիայի նախագահի՝ ԱՄՆ-ի և Թուրքիայի միջնորդությունը կանխել է Սիրիայի հարավում գտնվող Սուեյդա քաղաքի բախումները, որոնք կարող էին վերածվել տարածաշրջանային պատերազմի։

Հիշեցնենք, որ Սիրիայի Սուվեյդա քաղաքում բախումներ էին սկսվել դրուզների և բեդվինների միջև, որից հետո Իսրայելը հարվածել է Սիրիային՝ դրուզների պաշտպանելու համար։

Աղբյուր` turkiyegazetesi.com.tr