ERMENI HABER AJANSI

ԱՄՆ Պետդեպարտամենտի կողմից օգոստոսի 20-ին հրապարակված նամակում նշվել է, որ ԱՄՆ կառավարության բացասական դիրքորոշումը Թուրքիայի՝ F-35 կործանիչների արտադրության ծրագրին կրկին միանալու հարցում չի փոխվել։

Դեմոկրատ սենատոր Քրիս Փափասի գլխավորած Ներկայացուցիչների պալատի 40 անդամներից բաղկացած խումբը նամակ էր գրել պետքարտուղար Մարկո Ռուբիոյին՝ կոչ անելով կառավարությանը կանխել «ԱՄՆ ազգային անվտանգության հետ կապված օրենքների ու քաղաքականության խախտումը»։

Պետդեպի նամակում նշվել է․ «Մենք դժգոհություն ենք հայտնել Անկարայի՝ S-400 համակարգ գնելու որոշման վերաբերյալ։ Եվ հստակ ներկայացրել ենք այն քայլերը, որոնք պետք է ձեռնարկվեն Թուրքիայի կողմիցս CAATSA-ի պատժամիջոցներից ազատվելու համար»։

Նամակում նաև ընդգծվել է, որ Թուրքիան երկար տարիներ է, ինչ ՆԱՏՕ-ի դաշնակից երկիր է, և զգալի ներդրումներ է ունեցել դաշինքի առաքելություններում։

Զուգահեռ ասվել է նաև, որ ԱՄՆ-ի և Թուրքիայի միջև ռազմական հարաբերությունները շարունակում են կենսական կարևորություն ունենալ ինչպես ԱՄՆ-ի, այնպես էլ ՆԱՏՕ-ի անվտանգության շահերի համար:

Հիշեցնենք, որ ԱՄՆ-ի՝ «Պատժամիջոցների միջոցով Ամերիկայի հակառակորդների դեմ պայքարի մասին» (CAATSA) օրենքի շրջանակներում Թուրքիայի դեմ պատժամիջոցներ էին կիրառվել՝ Անկարայի կողմից ռուսական արտադրության S-400 հակաօդային պաշտպանության համակարգերի գնումից հետո։