ERMENI HABER AJANSI

Անկարայում Ինդոնեզիայի դեսպանատունը կազմակերպել էր ընդունելություն երկրի անկախության օրվա առթիվ։ Միջոցառմանը մասնակցել են Թուրքիայի փոխնախագահ Ջևդեթ Յըլմազը, Անկարայի ընդդիմադիր քաղաքապետ Մանսուր Յավաշը, Թուրքիա-Ինդոնեզիա միջխորհրդարանական բարեկամության խմբի նախագահ Այշե Բոհյուրլերը և այլ պաշտոնատար անձինք։

Անկարայում Ինդոնեզիայի դեսպան Ահմադ Ռիզալ Պուրնաման ելույթ է ունեցել և նշել է, որ տոնվում են երկու առանձին իրադարձություններ։ Առաջինը՝ Ինդոնեզիայի անկախության 80-ամյակը, երկրորդը՝ Թուրքիա-Ինդոնեզիա հարաբերութունների հաստատման 75-ամյակը։ 

Ըստ դեսպանի՝ երկու երկրների միջև գործընկերությունը դիվանագիտական հարաբերություններից զատ կառուցված է դժվար ժամանակներում վստահության, մարդկային հարաբերությունների և համերաշխության հիման վրա։

Դեսպանը նաև նշել է, որ ներկայիս հարաբերություններն ավելի ամուր են, քան երբևէ։ Երկու երկրների նախագահների գլխավորած «Բարձր մակարդակի ռազմավարական համագործակցության խորհուրդը» աջակցություն է տրամադրում  պաշտպանության, արդյունաբերության, էներգետիկայի, առողջապահության և կրթության ոլոտներին։ 

Անդրադառնալով տնտեսական հարաբերություններին՝ Պուրնաման նաև շեշտել է, որ Թուրքիայի և Ինդոնեզիայի նախագահների կողմից սահմնաված 10 մլրդ դոլարի առևտրաշրջանառության նպատակին հասնեու համար պետք է վերացվեն խոչընդոտները։

Եզրափակելով ելույթը՝ դեսպանը  հույս է հայտնել, որ երբ երկու երկրները 2050-ին կնշեն իրենց գործընկերության հարյուրամյակը, աշխարհում կլինի արդարություն, խաղաղություն և բոլորի համար լայն հնարավորություններ։