Էրդողան-Զելենսկի հեռախոսազրույց

Քաղաքական16:52, 28 Օգոստոս 2025

Էրդողան-Զելենսկի հեռախոսազրույց

Թուրքիայի նախագահ Ռեջեփ Թայիփ Էրդողանը հեռախոսազրույց է ունեցել Ուկրաինայի նախագահ Վոլոդիմիր Զելենսկու հետ։

Հեռախոսազրույցի ընթացքում քննարկվել են Թուրքիա-Ուկրաինա երկկողմ հարաբերություններին, ինչպես նաև ռուս-ուկրաինական խաղաղության գործընթացին, տարածաշրջանային և համաշխարհային զարգացումներին վերաբերող հարցեր։

Էրդողանն ընդգծել է, որ ուշադիր հետևել են Ալյասկայում և Վաշինգտոնում տեղի ունեցած շփումներին և հավելել, որ Թուրքիան շարունակելու է ջանքեր գործադրել պատերազմի խաղաղ հանգուցալուծման համար։

Նա նաև շեշտել է, որ Թուրքիան խաղաղության հաստատման հետ միասին շարունակելու է իր ներդրումն ունենալ Ուկրաինայի անվտանգության հարցում։

Թուրքիայի նախագահը նաև ասել է, որ Ուկրաինա-Ռուսաստան պատերազմում «արդար»լուծում հնարավոր է։ Նա անհրաժեշտ է համարել, որ երկու կողմերի միջև ընթացող բանակցությունները թափ հավաքեն և շարունակական լինեն։

«Թուրքիան պատրաստ է անել իր ձեռքից եկածը, այն բարձրաստիճան շփումների կայացման համար, որոնք խաղաղության ճանապարհ են բացելու»,-նշել է նա։

Էրդողանը նաև Զելենսկուն շնորհավորել է Ուկրաինայի անկախության օրվա առթիվ։

Աղբյուր` Trthaber.com