Պուտինն ու Էրդողանը քննարկել են Հայաստանի և Ադրբեջանի միջև բանակցությունները

Տարածաշրջան13:13, 01 Սեպտեմբեր 2025

Պուտինն ու Էրդողանը քննարկել են Հայաստանի և Ադրբեջանի միջև բանակցությունները

Շանհայի համագործակցության կազմակերպության (ՇՀԿ) գագաթնաժողովի շրջանակում կայացել է Թուրքիայի նախագահ Ռեջեփ Թայիփ Էրդողանի և ՌԴ նախագահ Վլադիմիր Պուտինի հանդիպումը։

Նախագահները քննարկել են երկկողմ հարաբերությունները, էներգետիկ համագործակցությունը և տարածաշրջանային հարցեր։

Պուտինն ու Էրդողանն անդրադարձել են նաև հացահատիկային միջանցքի վերագործարկմանը, էներգետիկ նախագծերին, առևտրի ծավալի ավելացմանը, Գազայում տիրող իրավիճակին և Սիրիայի զարգացումներին։

Անդրադառնալով ռուս-ուկրաինական հակամարտությանը՝ Էրդողանը նշել է, որ այդ հակամարտության արդար և մնայուն խաղաղությամբ վերջ դնելուն միտված Թուրքիայի ջանքերը շարունակվում են և համոզմունք է հայտնել, որ Ստամբուլի բանակցությունները նպաստել են խաղաղության գործընթացին։

Խոսելով նաև Հարավային Կովկասից՝ Թուրքիայի նախագահը հույս է հայտնել, որ Ադրբեջանի և Հայաստանի միջև բանակցությունները կհանգեցնեն մնայուն խաղաղության, և որ Կովկասում մնայուն կայունությունը կլինի ի շահ Թուրքիայի և Ռուսաստանի։

Աղբյուր` Turkiyegazetesi.com.tr, T.C. İletişim Başkanlığı