Ըստ Էրդողանի՝ Ադրբեջանն ու Հայաստանը հասել են խաղաղության ճանապարհի վերջին կետին

Քաղաքական15:51, 02 Սեպտեմբեր 2025

Ըստ Էրդողանի՝ Ադրբեջանն ու Հայաստանը հասել են խաղաղության ճանապարհի վերջին կետին

Թուրքիայի նախագահ Ռեջեփ Թայիփ Էրդողանը Չինաստանից վերադարձի ճանապարհին ինքնաթիռում պատասխանել է լրագրողների հարցերին։

Էրդողանը, ի պատասխան այսպես կոչված «Զանգեզուրի միջանցքի» և օգոստոսի 8-ին Վաշինգտոնում տեղի ունեցած խաղաղության գագաթնաժողովի մասին հարցին, ասել է.

«Հավատում եմ, որ Հարավային Կովկասը Ալլահի կամոք հասնելու է խաղաղության»:

Ապա հավելել, Սպիտակ տանը դրված ստորագրությունները, անշուշտ, արագություն են հաղորդել Հայաստան-Ադրբեջան կարգավորման գործընթացին։

«Ադրբեջանն ու Հայաստանը խաղաղության ճանապարհին զգալիորեն հաղթահարել են անհարթությունները և հասել են վերջին կետին։ Մենք մանրամասն քննարկում ունեցանք Ադրբեջանի նախագահ Իլհամ Ալիևի, ապա՝ Հայաստանի վարչապետ Նիկոլ Փաշինյանի հետ։ Երկու հանդիպումներում էլ տեսա, որ թե՛ Ալիևը, թե՛ Փաշինյանը նույն կետում են, նայում են նույն ուղղությամբ»,-հավելել է Էրդողանը:

Անդրադառնալով արդեն այսպես կոչված «Զանգեզուրի միջանցքի» ծրագրին՝ վերջինս ասել է, որ այդ հարցում որև խնդիր և կամ տարբերություն չկա:

«Պարոն Իլհամն այս հարցում իր վրա ավելի քան վստահ է։ Ավելին, ԱՄՆ այցի ընթացքում այդ հանդիպումն ու զրույցը կարծես որոշիչ է դարձել նրանց այս ուղղությամբ ձեռնարկելիք քայլերի համար»,-ասել է Էրդողանը:

Նրա խոսքով՝ խաղաղության հաստատմամբ տարածաշրջանում ցամաքային և երկաթգծային ուղիները ակտիվանալու են, սահմանային անցակետերը բացվելու են, իսկ առևտրի գլխավորությամբ՝ բազմաթիվ ոլորտներում դրական տեղաշարժ է գրանցվելու:

Վերջինս նաև իր կողմից նշվածները չափազանց կարևոր է համարել:

Ամփոփելով իր խոսքը՝ Էրդողանն ասել է, որ իրենք նույնպես դրական ազդեցություն են ունենալու այդ ոլորտներում։

«Նոր համագործակցության հնարավորությունների գնահատմամբ՝ տարածաշրջանի երկրները ևս դրանից կշահեն։ Սրանք շատ պարզ և հստակ են։ Ռուսաստանն ու Իրանը ևս առաջիկայում հասկանալու են, որ իրենց մտահոգություններն անտեղի են»։

Աղբյուր` Trthaber.com