Թուրքական զինուժը Գերմանիայից ստանալու է «Patriot» համակարգեր

Միջազգային08:48, 11 Դեկտեմբեր 2012

Թուրքական զինուժը Գերմանիայից ստանալու է «Patriot» համակարգեր

Թուրքական լրատվամիջոցները, հղում տալով գերմանական աղբյուրներին, տեղեկացնում են, որ Գերմանիան ՆԱՏՕ-ի շրջանակներում պատրաստվում է Թուրքիային տրամադրել հակաօդային պաշտպանության «Patriot» համակարգ: Դեկտեմբերի 12-ին Գերմանիայի խորհրդարանում քննարկվելու և քվեարկվելու է հիշյալ համակարգը Թուրքիային տրամադրելու մասին շրջաբերականը: Ակնկալվում է, որ այն կընդունվի:

Թուրքիան է նման համակարգ ստանալու ցանկություն հայտնել հյուսիսատլանտյան դաշինքի ղեկավարությանը` մատնանշելով Սիրիայից հնարավոր հարձակման վտանգը: Հատկացվելիք 25մլն եվրո արժողությամբ ռազմական այդ համակարգի դիմաց թուրքական իշխանությունները չեն վճարելու, նրանք միայն պարտավորվում են հոգալ համակարգի և նրա զինանձնակազմի կոմունալ ու սննդի ծախսերը:

Նախատեսվում է Թուրքիա ուղարկել երկու «Patriot» համակարգ և շուրջ 400 հոգուց բաղկացած սպասարկող զորախումբ: Դեռևս հստակեցված չէ, թե Թուրքիայի որ վայրում են տեղակայվելու հակաօդային պաշտպանության համակարգերը, բայց գերմանական կողմը չի ողջունում Սիրիայի հետ մերձսահմանային գոտում տեղակայելը: «Patriot» համակարգերը մնալու են Թուրքիայի զինուժի ենթակայության տակ մինչև 2014 հունվարի 31-ը: Եթե դրանից հետո սիրիական հարձակման վտանգ չլինի, դրանք հետ կուղարկվեն Գերմանիա:

Ermenihaber.am