Ռուսաստանը ցանկանում է Թուրքիայի հետ համատեղ հակահրթիռային կայաններ արտադրել

Միջազգային10:08, 20 Մայիս 2013

Ռուսաստանը ցանկանում է Թուրքիայի հետ համատեղ հակահրթիռային կայաններ արտադրել

CNN-ի թուրքական ծառայությունը, հղում անելով ռուսական «ՌԻԱ նովոստի» լրատվական գործակալությանը, տեղեկացնում է, որ Ռուսաստանը ցանկանում է Թուրքիայի հետ համատեղ ռուսական S-300 հեռահար հակահրթիռային համակարգերի արտադրություն սկսել:

Հաղորդվում է, որ ռուսական պետական զենքի կազմակերպություն՝ «Ռոսոբոռոնեքսպորտ»-ի նախագահ Սերգեյ Լադյագինը Պերուի մայրաքաղաք Լիմայում կազմակերպված զենքի ցուցահանդեսի ժամանակ, հիշեցնելով, որ Թուրքիայի՝ հեռահար հակաօդային պաշտպանության համակարգերի համար հայտարարած աճուրդը դեռ չի ավարտվել, հայտարարել է, որ Ռուսաստանը պատրաստ է Թուրքիայի հետ համատեղ սկսել ռուսական S-300 հակահրթիռային պաշտպանության հեռահար համակարգի կատարելագործված տարբերակի՝ S-300PMU1 –ի արտադրությաունը: Լադյագինն ավելացրել է նաև, որ հակահրթիռային համակարգերը կարող են նույնիսկ հարմարեցնել թուրքական հրթիռակիր մեքենաներին: Լադյագինը հայտարարել է նաև, որ նոր արտադրվելիք համակարգերը կարող են Թուրքիայի հետ միասին վաճառել երրորդ երկրի, որի համար Թուրքիային կտրամադրվի համապատասխան լիցենզիա:

Նշենք, որ S-300PMU1 հակահրթիռային համակարգերը 150 կմ հեռահարությամբ ունակ են հաջողությամբ խոցելու և ցածր, և բարձր թռչող ինքնաթիռներին ու բալիստիկ հրթիռներին:

Ermenihaber.am