ԱՄՆ պետքարտուղարը Դավութօղլուին. «Ահմեթ, քո տեղը ե՞ս պիտի խոսեմ»

Միջազգային08:28, 14 Հունվար 2014

ԱՄՆ պետքարտուղարը Դավութօղլուին. «Ահմեթ, քո տեղը ե՞ս պիտի խոսեմ»

Թուրքիայի արտգործնախարար Ահմեթ Դավութօղլուն և ԱՄՆ պետքարտուղար Ջոն Քերրին երկկողմ հանդիպում են անցկացրել Ֆրանսիայի մայրաքաղաքում: Դավութօղլուն Փարիզում հանդիպել է նաև իր ռուս պաշտոնակցի` Սերգեյ Լավրովի հետ: Նախարարները հայտարարություններով հանդես են եկել լրագրողներին առջև:

Ըստ թուրքական «Ջումհուրիյեթ» օրաթերթի` ԱՄՆ պետքարտուղարը Թուրքիայի մասով նշել է, որ իրենք մտահոգված են այդ երկրում օրենքի գերակայության խնդրով: Քերրին հայտնել է, որ Վաշինգտոնը նպատակ չունի խառնվել Թուրքիայի ներքին գործերին, բայցևայնպես Դավութօղլուի հետ հանդիպման ժամանակ քննարկվել են օրենքի գերակայությանն առնչվող հարցեր:

Ուշագրավ մի դրվագ է եղել, որը չի վրիպել հատկապես Թուրքիայի ընդդիմության ուշադրությունից: Այն ժամանակ, երբ Դավութօղլուն լրագրողներին ընթերցում էր իր ձեռքում եղած տեքստը, ԱՄՆ պետքարտուղարը շրջվել է դեպի թուրք նախարարն ու հարցրել. «Մեր հանդիպման մասին խոսելու՞ ես, թե° ես խոսեմ քո տեղը»: Սա անհարմար դրության մեջ է դրել է Դավութօղլուին:

Նախարարների փարիզյան հանդիպմանը անդրադարձած Թուրքիայի ընդդիմադիր«Ժողովրդահանրապետական կուսակցության» (ԺՀԿ-CHP) փոխանագահ Ֆարուք Լողողլուն մամուլի ասուլիսի ժամանակ հայտնել է իր դժգոհությունը: Նախ նա դժգոհել է, որ Դավութօղլուն խոսել է ամերիկյան, իսկ Քերրին թուրքական դրոշի ներքո: Բացի այդ Ֆրանսիայում կա թուրքական դեսպանատուն և ԱՄՆ պետքարտուղարը Թուրքիայի հարցով հանդիպումը կարող էր անցկացնել այնտեղ:

Լողողլուն ընդգծել է մի հանգամանք ևս. Թուրքիայի վարչապետ Էրդողանը երկրում ծագած կոռուպցիոն սկանդալից հետո վերջերս մեղադրանք է հասցեագրում ԱՄՆ-ին և Իսրայելին Թուրքիայի դեմ որոգայթ լարելու համար:

«Բայց պրն Դավութօղլուն Քերրիի հետ հանդիպմանը դեմքի երջանիկ արտահայտություն ուներ: Ասել է թե` գոհունակություն էր զգում Քերրիի հայտարարությունից: Այդ դեպքում ստացվում է, որ վարչապետի այն թեզը, թե արտաքին ուժերն են Թուրքիայում սկանդալ հրահրում, հօդս է ցնդում»,- կարծիք է հայտնում է ընդդիմադիր գործիչը:

Ermenihaber.am