Մոսադը հրապարակել է իր հետ համագործակցած մուսուլմանական երկրների անունները

Միջազգային16:09, 13 Փետրվար 2014

Մոսադը հրապարակել է իր հետ համագործակցած մուսուլմանական երկրների անունները

Իսրայելի բանակի պաշտոնական կայքում տեղ գտած մի հաշվետվության մեջ հրապարակվել է մի շարք մուսուլմանական երկրների անուններ, որոնք համագործակցել են Իսրայելի հետախուզական ծառայության՝ «Մոսադի» հետ: Թուրքական «Հաբեր բյուլենթի» էլեկտրոնային լրատվականի հաղորդմամբ՝ համագործակցությունը ծավալվել է անվտանգության, հետախուզության և ռազմական ոլորտներում:

«Մոսադի» հետ համագործակցած մուսուլման երկրների ցուցակում են հայտնվել Սաուդյան Արաբիան, Միացյալ արաբական էմիրությունները, Աֆղանստանը և Ադրբեջանը:

Ըստ հաշվետվության՝ համագործակցության շրջանակներում Իսրայելին տեղեկություններ է տրամադրվել Բահրեյնի, Իրանի և Պաղեստինի վերաբերյալ: Նշվում է, որ Իրանի միջուկային ծրագրի մասով Սաուդյան Արաբիայի հետ ուղղակի համագործակցություն է ծավալվել, ինչի առիթով նույնիսկ «Մոսադի» նախորդ ղեկավարը մեկնել է Սաուդյան Արաբիա՝ թեման տեղում քննարկելու նպատակով:

Հաշվետվության մեջ բացահայտվում է նաև, որ Իսրայելը Ադրբեջանին ու Աֆղանստանին վաճառած զինամթերքը մատակարել է Պակիստանի տարածքով:

Նշվում է, որ զինտեխնիկայի վաճառքը միտված է եղել ոչ միայն Իսրայելի տնտեսական վիճակի բարելավմանը, այլ ռազմավարական անվտանգության շահեր ձեռք բերելու նպատակ է ունեցել: