Գերմանիայի քաղաքական գործիչները դատապարտել են Էրդողանի` ընդդիմությանն ուղղված սպառնալիքները

Միջազգային08:20, 02 Ապրիլ 2014

Գերմանիայի քաղաքական գործիչները դատապարտել են Էրդողանի` ընդդիմությանն ուղղված սպառնալիքները

Այն բանից հետո, երբ տեղական ինքնակառավարման մարմինների (ՏԻՄ) ընտրություններում Թուրքիայի իշխող «Արդարություն և զարգացում» կուսակցությունը (ԱԶԿ) հաղթանակ տարավ, վարչապետ Ռեջեփ Թայիփ Էրդողանն իր հրապարակային ելույթում ընդդիմադիր ուժերին հասցեագրված կտրուկ ու կոշտ ձևակերպումներով հանդես եկավ: Վերլուծաբանները նկատել տվեցին, որ այդ կերպ Էրդողանը ընդդիմադիրների հետ գալիք հաշվեհարդարների ազդակ է տվել: Նա մասնավորապես ասել էր, որ հակառակորդ ուժեչը «դեռ վճարելու են»:

Նույն տպավորությունն են ստացել նաև Գերմանիայի որոշ քաղաքական գործիչներ: Մասնավորապես «Քրիստոնեա-սոցիալական միություն» կուսակցությունը կոչ է արել դադարեցնել Թուրքիայի հետ եվրաանդամակցության բանակցությունները: Պաշտոնական Անկարայի հասցեին քննադատություններ են հնչել նաև Գերմանիայի իշխանական «Քրիստոնեա-դեմոկրատական» և «Սոցիալ-դեմոկրատական» կուսակցություններից:

Մասնավորապես «Քրիստոնեա-սոցիալական միություն» կուսակցության քարտուղարը Մյունխենում հայտարարել է, որ Էրդողանն աստիճանաբար ցույց է տալիս, որ Թուրքիան չի պատկանումԵվրոպային:

«Այն երկիրը, որտեղ իշխանություններն ընդդիմադիրներին սպառնում են, երբեք չի կարող մաս կազմել Եվրոպային»:

Իսկ եվրախորհրդարանի սոցիալիստների խմբակցության նախագահ Հաննես Սվոբոդան twitter միկրոբլոգի իր էջում հետևյալ գրառումն է կատարել. «Ես ստիպված եմ հարգանք ցուցաբերել Էրդողանի` ընտրություններում տարած հաղթանակի նկատմամբ, բայց նա էլ պետք է հարգի անձի ազատությունները»:

Ermenihaber.am