Գյուլենականների նամակը ցնցել է Թուրքիան և համարվել դավաճանական

Միջազգային09:03, 10 Ապրիլ 2014

Գյուլենականների նամակը ցնցել է Թուրքիան և համարվել դավաճանական

Թուրքիայում նոր սկանդալ է հասունանում, որը կրկին կապվում է «զուգահեռ կառույցի» և հայտնի իսլամական գործիչ, գյուլենական շարժման առաջնորդ Ֆեթուլլահ Գյուլենի անվան հետ:

Ամերիկայում «Peace Islands» ինստիտուտի համաշխարհային հարաբերությունների ղեկավար Մեհմեթ Քըլըչը ԱՄՆ-ում օտարերկրյա ներկայացուցչություններին, լոբբիստական կազմակերպություններին և վերլուծական կենտրոններին նամակ է ուղարկել, որով քննադատում է Թուրքիային: Մեհմեթ Քըլըչի ղեկավարած կառույցի պատվավոր նախագահը Ֆեթուլլահ Գյուլլեն է, որի անունը շրջանառվում է Թուրքայի պատմության մեջ ամենամեծ կոռուպցիոն օպերացիան կազմակերպելու հետ:

Թուրքական մամուլն այդ նամակը անվանել է դավաճանական՝ մատնանշելով, որ այն հրապարակվել է մի ժամանակահատվածում, երբ ԱՄՆ-ում կրկին բարձրացվել է Հայոց ցեղասպանության հարցը, իսկ թուրքական լոբբին պատրաստվում է դրա դեմ պայքարին, ինչպես նաև համընկել է 2015 թվականին ՄԱԿ-ի ՄԱԿ-ի անվտանգության խորհրդում (ԱԽ) ժամանակավոր անդամի կարգավիճակի շուրջ բանակցությունների ընթացքին:

Նամակում նշվում է, որը 90 տարի շարունակ Մերձավոր Արևելքի համար ժողովրդավարության օրինակ համարվող Թուրքիայում այժմ այդ ժողովրդավարությունը ճգնաժամ է ապրում:

Քըլըչը անդրադարձել է նաև դեկտեմբերի 17-ի հակակոռուպցիոն օպերացիային՝ նշելով, որ դրա արդյունքում ձերբակալվել էին նախարարերի որդիներ, անվանի գործարարներ: Նա քննադատում է այդ օպերացիայից հետո Թուրքիայի կառավարության և վարչապետ Ռեջե Թայիփ Էրդողանի որդեգրած դիրքորոշումը՝ ոստիկանության և արդարադատության ոլորտի աշխատակիցներին հեռացնելը կամ ծառայության այլ վայրեր տեղափոխելը: