Ավստրիացիների 70 տոկոսը չի ցանկանում, որ Թուրքիայի վարչապետն այցելի իրենց երկիր

Միջազգային11:59, 19 Հունիս 2014

Ավստրիացիների 70 տոկոսը չի ցանկանում, որ Թուրքիայի վարչապետն այցելի իրենց երկիր

Թուրքիայի վարչապետ Ռեջեփ Թայիփ Էրդողանի` Ավստրիա կատարելիք այցին ընդառաջ տեղի մամուլը որոշ հրապարակումներ են անում, որոնք թուրքական լրատվամիջոցները բնութագրում են որպես սադրանք: Այսպես օրինակ` «Kurier am Feiertag» թերթը «Որպես նախընտրական քարոզարշավի քարոզիչ բարով չես եկել» վերտառությամբ շապիկով է հրատարակվել: Նույն այդ պարբերականը գրում է, որ Ավստրիայի ժողովրդի 70 տոկոսը չի ցանկանում, որ Թուրքիայի վարչապետն այցելի իրենց երկիր: Նշվում է, որ ավելի քան 10.000 մարդ բողոքի է դուրս գալու Էրդողանի այցի դեմ: Հրապարակված նյութում Էրդողանը բնութագրվել է որպես «հզոր կոկորդով մարդ»:

«Bulvar» թերթի հոդվածում տեղ է գտել հետևյալ ձևակերպումը. «Սուլթան Էրդողանի քարոզչական շոուն»: Ավստրիական «Österreich» թերթն էլ տեղեկացնում է, որ Թուրքիայի վարչապետի այցի կապակցությամբ խստացվել են անվտանգության միջոցառումները, ծառայողական պարտականությունների կատարմանն է անցել ավելի քան 2000 ոստիկան:

Հիշեցնենք, որ Թուրքիայում մեծ արձագանք էր գտել Ավստրիայի 28-ամյա արտգործնախարար Սեբաստիան Քուրզի հարցազրույցը, որտեղ զգուշացրել էր Էրդողանին՝ նշելով, որ նա չի կարող պառակտել Ավստրիայի հասարակությունը:

«Ինտեգրացիան շատ նուրբ հարց է: Սխալ մի խոսքը մեզ հետ կմղի, միջավայրըկթունավորի: Էրդողանը պարտավոր է այստեղ ապրող թուրքերին ասել, որ գերմաներեն սովորեն և հավատարիմ լինեն Ավստրիային: Սակայն, եթե խոսի այնպես, ինչպես Գերմանիայում, ապա դա կլինի ի վնաս թուրքերի»,- հայտնել էր արտգործնախարարը: Ավստրիացի նախարարի հայտարարությանն ի պատասխան «Cyber-Warrior Akıncılar» անունով թուրք հաքերները կոտրել էին նրա կայքը՝ տեղադրելով Սուլեյման Առաջին սուլթանի ու Էրդողանի նկարը և թողնելով հետևյալ գրությունը. «Ո՞վ ես դու, փոքրի՛կ: Դու չես կարող որոշել, թե մեր վարչապետը ինչպես խոսի: Վարչապետ Էրդողանը այն մարդու թոռն է, ով հասել է մինչև Վիեննա, մինչև այն տարածքները, որտեղ հիմա ապրում եք դուք»:

Ermenihaber.am