Թուրքական ASELSAN-ը ռազմական համագործակցություն է սկսում աֆրիկյան գործընկերների հետ

Միջազգային10:17, 18 Սեպտեմբեր 2014

Թուրքական ASELSAN-ը ռազմական համագործակցություն է սկսում աֆրիկյան գործընկերների հետ

Թուրքական ASELSAN ընկերությունը համագործակցության պայմանագիր է ստորագրել Հարավային Աֆրիկայի Հանրապետության (ՀԱՀ) ռազմարդյունաբերական խոշարագույն ընկերություններից մեկի` Paramount Advanced Technologies-ի (PAT) հետ:

ASELSAN-ի ներկայացուցիչները Հարավաֆրիկյան Հանրապետությունում մասնակցել են միջազգային էքսպոյի և ներկայացրել ռազմական նշանակության իրենց արտադրանքի տեսականին: Էքսպոյին մասնակցել են ավելի քան 400 նմանատիպ կազմակերպություններ աշխարհի տարբեր երկրներից:

Նշյալ պայմանագրով երկու ընկերությունները տեղական և միջազգային շուկաներում միասին գործելու պայմանավորվածություն են ձեռք բերել: Թուրքական «Սաբահ» թերթը տեղեկացնում է, որ այդ պայմանագրի կնքմամբ ճանապարհ է բացվում երկու ընկերութունների համատեղ նախագծերի իրականացման համար:

Նշենք, որ շուրջ 40 տարվա գործունեության պատմություն ունեցող ASELSAN-ը համարվում է Թուրքիայի խոշորագույն ռազմարդյունաբերական ընկերությունը, որը մասնագիտացված է ռազմական նշանակության էլեկտրոնային սարքավորումների արտադրության մեջ: Հիմնադրվել է 1975-ին թուրքական բանակի զինանոցը ժամանակակից սարքավորումներով հագեցնելու նպատակով: 1983-ին սկսել է իր արտադրանքի առաջին արտահանումը: Այս պահի դրությամբ ASELSAN-ը ունի մինչև 2024 թվականը նախանշված 9.4 մլրդ ամերիկյան դոլարի պայմանագրեր:

Ermenihaber.am