Էրդողանը մեկնելու է Նյու Յորք` մասնակցելու ՄԱԿ-ի նստաշրջանին

Միջազգային07:39, 20 Սեպտեմբեր 2014

Էրդողանը մեկնելու է Նյու Յորք` մասնակցելու ՄԱԿ-ի նստաշրջանին

Թուրքիայի նախագահ Ռեջեփ Թայիփ Էրդողանը սեպտեմբերի 21-ին մեկնելու է Միացյալ Նահանգներ` մասնակցելու սեպտեմբերի 22-ից հոկտեմբերի 1-ը Նյու Յորքում անցկացվելիք ՄԱԿ-ի գլխավոր ասամբլեայի 69-րդ նստաշրջանին: Նախագահականի մամուլի ծառայության տարածած հաղորդագրության համաձայն` նստաշրջանին մասնակցելու են պատվիրակություններ աշխարհի 193 երկրից նախագահի կամ վարչապետի մակարդակով:

Թուրքիայի նախագահի հետ միասին Նյու Յորք են մեկնելու արտգործնախարար Մևլութ Չավուշօղլուն, շրջակա միջավայրի և քաղաքաշինության նախարար Իդրիս Գյուլլունջեն, Էկոնոմիկայի նախարար Նիհաթ Զեյբեքչին, Եվրամիության հարցերով նախարար և գլխավոր բանագնաց Վոլքան Բոզքըրը և մի շարք պաշտոնատար այլ այրեր:

Թուրքական «Անկա» լրատվական գործակալությունը հայտնում է, որ այցի շրջանակներում նախատեսվում է Էրդողանի հանդիպումը հայ եկեղեցու արևելյան թեմի արքեպիսկոպոսի, ԱՄՆ մահմեդական համայնքի ներկայացուցիչների և հրեական համաշխարհային կոնգրեսի պատվիրակության հետ: Բացի այդ Էրդողանը, մասնակցելով «Միջազգային հարաբերությունների խորհուրդ» անվամբ վերլուծական կենտորնում կազմակերպվելիք համաժողովին, հանդես է գալու ելույթով:

Նշվում է նաև, որ Թուրքիայի նախագահը հրավիրվելու է ամերիկյան մի շարք ընկերությունների ներկայացուցիչների մասնակցությամբ տրվելիք աշխատանքային ճաշին և ամերիկյան ներդրողներին ներկայացնելու է Թուրքիայի բիզնես-միջավայրը, պոտենցիալն ու առևտրատնտեսական հնարավորությունները:

Ermenihaber.am