Էրդողանը չի բացառել, որ ռազմական աջակցություն կցուցաբերի «ԻՊ»-ի դեմ պայքարող միջազգային կոալիցիային

Միջազգային08:35, 24 Սեպտեմբեր 2014

Էրդողանը չի բացառել, որ ռազմական աջակցություն կցուցաբերի «ԻՊ»-ի դեմ պայքարող միջազգային կոալիցիային

Նյու Յորքում գտնվող Թուրքիայի նախագահ Ռեջեփ Թայիփ Էրդողանը լրագրողների հետ հանդիպման ժամանակ իր դրական վերաբերմունքն է հայտնել այն կապակացությամբ, որ ԱՄՆ-ի գլխավորած հակաահաբեկչական միջազգային կոալիցիան հարվածներ է հասցրել «Իսլամական պետություն» (ԻՊ) կոչվով ահաբեկչական խմբավորման` Սիրիայի հենակետերին:

«Ջիհան» լրատվական գործակալության թղթակցի հարցին, թե Թուրքիան ինչ ներդրում է պատրաստվում ունենալ ահաբեկիչների դեմ մղվող պայքարում, Էրդողանը հստակ պատասխան չի տվել` ասելով, որ կվերադառնա Թուրքիա, կառավարության հետ կխոհրդակցի, նոր պարզ կլինեն Անկարայի կատարելիք քայլերը: Իսկ այն հարցին, թե հնարավոր է Թուրքիան նաև ռազմական ներդրում ունենա, Էրդողանը արձագանքել է.

«Ընկերներ, մեր աջակցությունը ամեն տեսակ կարող է լինել, ռազմական, քաղաքական և այլ»:

Հիշեցնենք, որ Թուրքիան հրաժարվել էր մաս կազմել վերոնշյալ միջազգային կոալիցային, որի նպատակը Սիրիան և Իրաքը ահաբեկած «ԻՊ»-ի գրոհայիններին վնասազերծելն է` պատճառաբանելով Մոսուլում «ԻՊ»-ի կողմից պատանդ պահվող Թուրքիայի 49 քաղաքացիների առկայությունը: Բայց վերջիններս արդեն ազատ են արձակվել:

ԱՄՆ պետքարտուղար Ջոն Քերրին Թուրքիայի արտգործնախարար Մևլութ Չավուշօղլուի հետ անցկացրած ահնդիպումից հետո հայտարարել է, որ պատանդների ազատ արձակումից հետո արդեն Թուրքիան կկարողանա առաջավոր դիրքեր զբաղեցնել «ԻՊ»-ի դեմ մղվող պայքարում:

Ermenihaber.am