Շան տեսքով Էրդողանի ծաղրանկարի պատճառով Թուրքիան բողոքի նոտա է հղել Գերմանիային

Միջազգային12:57, 04 Նոյեմբեր 2014

Շան տեսքով Էրդողանի ծաղրանկարի պատճառով Թուրքիան բողոքի նոտա է հղել Գերմանիային

Գերմանիայի Ֆրիդրիխսհաֆեն քաղաքի դպրոցական դասագրքերում տեղ է գտել Թուրքիայի նախագահ Ռեջեփ Էրդողանի ծաղրանկարը, որտեղ նա պատկերված է բնում կապված շան տեսքով: Գերմանաբնակ թուրքերը բողոքի ձայն են բարձրացրել և պահանջում են Էրդողանին նսեմացնող ծաղրանկարն անհապաղ հանել դասագրքերից:

Ծաղրանկարում նախագահ Էրդողանը պատկերված է ատամները կրճտացնող շղթայված շան տեսքով, իսկ պատկերը վերնագրված է` «Թուրքերը Գերմանիայում, հաջողության պատմություն»:

Թուրքական սպորտային ակումբներից «Dostlukspor»-ի նախագահ Նուրի Այը նշել է, որ եթե ծաղրանկարը հրապարակվեր լրագրերում և ամսագրերում, դա դեռ կարելի էր հասկանալ, բայց երբ տեղ է գտնում դպրոցական դասագրքում, դա արդեն անընդունելի է և չար նպատակ է հետապնդում:

Թուրքական «Միլլիյեթ» պարբերականը տեղեկացնում է, որ հիշյալ ծաղրանկարը վերցվել է Ֆրանկֆուրտի «Algemain» թերթից:

Թուրքիայի արտգործնախարարությունը ծաղրանկարը դատապարտող հայտարարություն է տարածել, որում նշվում է, թե երկրում հավատարմագրված Գերմանիայի Դաշնային Հանրապետության դեսպան Էբերհարդ Փոլը կանչվել է արտգործնախարարություն, որտեղ նրան բողոքի նոտա է հանձնվել: