Աշխարհում Էրդողանն առաջինն է, Բրունեի սուլթանը` երկրորդը

Միջազգային10:23, 05 Նոյեմբեր 2014

Աշխարհում Էրդողանն առաջինն է, Բրունեի սուլթանը` երկրորդը

Թուրքիայում հանրային դժգոհության ալիք է բարձրացրել նոր նախագահական նստավայրի (Աք Սարայ) վրա ծախսվող ահռելի գումարը: Ընդդիմադիր մամուլում, սոցմեդիայում և բլոգներում խստորեն դատապարտում են նախագահ Ռեջեփ Թայիփ Էրդողանի բավականին թանկարժեք նախաձեռնությունը և նախասիրությունը:

Թուրքիայի ֆինանսների նախարար Մեհմեթ Շիմշեքը խորհրդարանում հայտարարել է, որ նոր նախագահական պալատի արժեքը կազմում է 1 մլրդ 370 մլն թուրքական լիրա (շուրջ 615 մլն դոլար): Թուրքական «Ջումհուրիյեթ» լրատվականը նկատել է տալիս, որ նոր նստավայրի միայն մուտքի սանդուղքների կառուցման վրա ծախսվել է 4 մլն դոլար: Նույն աղբյուրի համաձայն`Էրդողանի նստավայրը զբաղեցնում է այնքան տարածք, որտեղ կտեղավորվեր 137 միջնակարգ դպրոց:

Թուրքիայի նոր նախագահական պալատը հավակնում է լինել աշխարհում ամենամեծը: Ըստ զբաղեցրած տարածքի (300.000քմ)` Էրդողանի նոր նստավայրն այժմ առաջինն է աշխարհում: Երկրորդ տեղում Բրունեի սուլթանի նստավայրն է (200.000քմ):

Համեմատության համար նշվում է, որ օրինակ Անգլիայի Բուքինգհեմյան պալատը զբաղեցնում է 77.000քմ, Սպիտակ տունը` 55.000քմ, իսկ Կրեմլը` 25.000քմ տարածք:

Ermenihaber.am