Թուրքիայի իշխանությունները դեմ են, որ Բուլղարիայում հայերի անունով զբոսայգի անվանակոչվի

Միջազգային07:16, 27 Մարտ 2015

Թուրքիայի իշխանությունները դեմ են, որ Բուլղարիայում հայերի անունով զբոսայգի անվանակոչվի

Թուրքիան ընդդիմացել է Բուլղարիայի հարավում գտնվող Հասքովո քաղաքի զբոսայգին «Armentsi» անվանակոչելու գաղափարին: «Armentsi» բառը բուլղարերենից թարգմանաբար նշանակում է «հայեր»:

Պլովդիվում Թուրքիայի գլխավոր հյուպատոս Ալփեր Աքթաշը Հասքովի քաղաքապետ Գեորգի Իվանովի հետ հանդիպմանը հայտնել է, որ Անկարան դեմ է այդ նախագծին և հորդորել անհապաղ հետ կանգնել այդ քայլից: Մինչդեռ քաղաքապետ Իվանովը,«Trud» թերթի լրագրողին ասել է, որ ճիշտ չի համարում այլ երկրի, տվյալ դեպքում` Թուրքիայի միջամտությունը Բուլղարիայի ներքին գործերին:

Իվանովը հիշեցրել է, որ Հասքովոյում մեծ թվով հայեր են ապրում, ու բացի այդ, բուլղարական իշխանություններն իրենց երկրում որևէ վայր անվանափոխելու համար չեն պատրաստվում այլ երկրից թույլտվություն ստանալ:

Նշենք, որ Հասքովոյի քաղաքային ավագանին այսօր է քննարկման դնելու վերոնշյալ զբոսայգին «Armentsi» անվանակոչելու մասին հայկական համայնքից ստացած առաջարկը:

Աղբյուր` Ermenihaber.am