Թուրքիայից ԱՄՆ-ի ու Գերմանիայի «Patriot» ՀՕՊ համակարգերի դուրսբերման պատճառները

Միջազգային09:03, 17 Օգոստոս 2015

Թուրքիայից ԱՄՆ-ի ու Գերմանիայի «Patriot» ՀՕՊ համակարգերի դուրսբերման պատճառները

Գերմանական հայտնի «Frankfurter Allgemeine Zeitung» (FAZ) պարբերականն անդրադարձել է Գերմանիայի և ԱՄՆ-ի կողմից Թուրքիայի սահմանամերձ Քահրամանմարաշ (պատմ. Մարաշ) նահանգից գերմանական «Patriot» տեսակի հակաօդային պաշտպանության համակարգերի (ՀՕՊ) դուրսբերման և ժամկետի չերկարացնելու մասին որոշման իրական պատճառին:

Թուրքական «hurriyet» թերթի կայքը, հղում անելով գերմանական պարբերականին, որն էլ իր հերթին հիմնվում է Գերմանիայի կառավարության բարձրաստիճան պաշտոնյաների հայտարարությունների վրա, նշում է, որ վերոնշյալի գլխավոր պատճառը «Քուրդիստանի բանվորական կուսակցության» (ՔԲԿ-PKK) դեմ թուրքական զինուժի գործողություններն են: Որպես մեկ այլ պատճառ առաջ է քաշվում այն փաստը, որ Թուրքիան արդեն երկար ժամանակ «Իսլամական պետություն» (ԻՊ) ահաբեկչական կազմակերպության դեմ անհրաժեշտ գործողություններ և միջոցներ չի ձեռնարկում:

Նշենք, որ պաշտոնական հարթակում, որպես «Patriot» ՀՕՊ-երի դուրսբերման գլխավոր պատճառ, առաջ էր քաշվում այն հանգամանքը, որ այժմ Թուրքիային Սիրիայից վտանգ չի սպառնում:

Հավելենք, որ գերմանական կառավարությունը պատրաստվում է 2016թ. հունվարի 31-ին դադարեցնել «Patriot» ՀՕՊ համակարգերի շահագործումը: Այդ ժամանակ էլ Թուրքիայում ծառայություն իրականացնող գերմանացի 250 զինվորներ պետք է վերադառնան հայրենիք:

Աղբյուր` Ermenihaber.am