Ջեմ Օզդեմիրը ԵՄ-ին կոչ է արել սառեցնել Թուրքիայի հետ երկխոսությունը

Միջազգային13:33, 12 Հոկտեմբեր 2015

Ջեմ Օզդեմիրը ԵՄ-ին կոչ է արել սառեցնել Թուրքիայի հետ երկխոսությունը

Գերմանիայի Կանաչների կուսակցության համանախագահ, ազգությամբ թուրք Ջեմ Օզդեմիրն Անկարայում տեղի ունեցած պայթյունների վերաբերյալ հայտարարություն է արել:

Թուրքական «Taraf» պարբերականի կայքի տեղեկացմամբ՝ Օզդեմիրը նշել է, որ պայթյունները կազմակերպվել են իշխանության կողմից՝ նոյեմբերի 1-ի ընտրությունների նորմալ ընթացքը խանգարելու և ընտրությունների նախաշեմին երկրում քաոս առաջացնելու նպատակով:

«Ինչպես երևում է՝ ամեն ինչ անում են, որպեսզի կանխեն նորմալ և արդար ընտությունների կազմակերպումը»,- ասել է նա՝ կարծիք հայտնելով, որ ընտրությունների կանոնավոր ընթացքի դեպքում Թուրքիայի իշխող «Արդարություն և զարգացում» կուսակցությունը և Էրդողանը կրկին չեն կարողանալու խորհրդարանում մեծամասնություն ապահովել:

«Օզդեմիրը Եվրամիությանը կոչ է արել՝ դադարեցնել Թուրքիայի հետ ընթացող բանակցությունները: «Ցանկացած համաձայնություն կարող է տպավորություն ստեղծել, թե Էրդողանը մեզ համար նորմալ զրուցակից է: Նոյեմբերի 1-ի ընտրություններից առաջ մենք պետք է խուսափենք այնպիսի քայլերից, որոնք կարող են գնահատվել որպես աջակցություն Էրդողանին: Ընտրություններում հավանական պարտության դեպքում սեփական սխալների համար պատասխան տալու անհրաժեշտության վախից իր սեփական երկրում քաոս առաջացնող ղեկավարը չի կարող վստահելի գործընկեր լինել»:

Գերմանացի քաղաքական գործիչը նշել է նաև, որ ով էլ լինի Անկարայի պայթյունների կազմակերպիչը, դրա անմիջական թիրախը եղել են Թուրքիայի ընդդիմադիր «Ժողովրդահանրապետական» (ԺՀԿ- CHP) և «Ժողովուրդների դեմոկրատական» (ԺԴԿ- HDP) կուսակցությունները, որոնք ևս ներկա են եղել Անկարայի խաղաղ ցույցին: Ըստ Օզդեմիրի՝ պայթյուններն ակնհայտ սադրանք են, որոնց նպատակը ընտրություններից առաջ երկրում քաոս առաջացնելն է:

Աղբյուր` Ermenihaber.am