ԵՄ-ն Թուրքիայի հետ ցանկանում է նոր բանակցություններ սկսել` անդամակցության վերաբերյալ

Միջազգային09:57, 19 Նոյեմբեր 2015

ԵՄ-ն Թուրքիայի հետ ցանկանում է նոր բանակցություններ սկսել` անդամակցության վերաբերյալ

Եվրամիության (ԵՄ) ընդլայնման հարցերով հանձնակատար Յոհաննես Հանը հայտարարել է, որ ԵՄ-ն ցանկանում է Թուրքիայի հետ նոր բանակցություններ սկսել:

Ըստ թուրքական «gazetevatan.com» լրատվական կայքի` Հանը նման հայտարարություն է արել «Reuters» լրատվական գործակալությանը տված հարցազրույցի ժամանակ:

«Թուրքիայի հետ հարաբերություններում նոր ակտիվություն կա: Մինչև տարեվերջ Թուրքիային ԵՄ անդամակցության հարցով կրկին բանակցությունները սկսելու առաջարկ եմ անելու»,- ասել է Հանը:

Հանի խոսքերով` Բրյուսելը ցանկանում է Էրդողանի պահանջով անցկացվելիք Թուրքիա-ԵՄ գագաթնաժողովին Թուրքիայի հետ բանակցությունների նոր սկիզբ դնել:

Աղբյուրը նշում է, որ անարդյունք անցած անդամակցության 10 տարվա բանակցություններից հետո ԵՄ-ն այժմ սկսել է ակտիվացնել Թուրքիայի հետ հարաբերությունները` կարևորելով վերջինի դերը Սիրիայի փախստականների հարցում:

ԵՄ-ն Թուրքիային 3 մլրդ եվրոյի աջակցություն, անդամակցության բանակցությունների ինտենսիվացում և վիզային ռեժիմի դյուրացում է առաջարկում` 2,2 մլն սիրիացի փախստականներին իր սահմաններում պահելու համար:

Հանը նշել է նաև, որ բանակցություններում Թուրքիայի` Սիրիայի հյուսիսում անվտանգության գոտի ստեղծելու մտադրությունը չի քննարկվելու:

Աղբյուր` Ermenihaber.am