Եվրամիությունը վիզային արտոնությունների համար Թուրքիային 72 պայման է առաջադրել

Միջազգային12:59, 01 Դեկտեմբեր 2015

Եվրամիությունը վիզային արտոնությունների համար Թուրքիային 72 պայման է առաջադրել

Եվրամիությունը (ԵՄ) Թուրքիայի քաղաքացիներին առանց վիզայի մուտք գործելու իրավունք տրամադրելու համար 72 կետանոց պահանջագիր է ներկայացրել:

Ըստ թուրքական «sondakika.com» լրատվական կայքի` Թուրքիան առաջադրված 72 պայմանի կատարման դեպքում միայն կարող է ապահովել իր քաղաքացիների համար Շենգեն վիզայի տրամադրում:

Ըստ նախօրեին Բրյուսելում կնքված համաձայնագրի` Թուրքիան պարտավոր է ամրագրված 72 կետերը կյանքի կոչել 10-ամսյա ժամկետում, ինչից հետո ԵՄ առաջնորդների գագաթնաժողովում Թուրքիային վիզային արտոնություններ տալու որոշում կկայացվի:

Նշվում է, որ այդ պայմանների շարքում առաջնայիններից է Թուրքիայի Հանրապետության անձնագրերի ամբողջական համապատասխանեցումը եվրոպականին:

Կարևոր պայման է նաև Թուրքիայի կողմից Ռեադմիսիայի (հետ ընդունման) համաձայնագրի կիրառումը, որը Թուրքիայի ու ԵՄ-ի միջև կնքվել է դեռևս 2013-ի դեկտեմբերին: Նշյալ համաձայնագրի կիրառմամբ Թուրքիան պարտավորվելու է հետ ընդունել իր տարածքով անօրինական ճանապարհներով ԵՄ անցած փախստականներին: Թուրքիան պարտավոր է հետ վերադարձված փախստականներին ապաստան հատկացնել: Հետո համապատասխան գործընթացների արդյունքում կպարզվի, թե ով որ երկրից է ու կուղարկվի այդ երկիր:

Համաձայնագրով նախատեսվում է նաև, որ Թուրքիան պետք է բարելավի այս պահին Քըրքլարելիում, Հաթայում ու Իզմիրում գործող փախստականների ճամբարային պայմանները` միաժամանակ նորերը հիմնելով կենտրոնական Անատոլիայի, ինչպես նաև երկրի արևելյան և հարավ-արևելյան շրջաններում:

Այն երկրների դեպքում, որոնց հետ Թուրքիան վերացրել է վիզային ռեժիմը, բայց ԵՄ-ն կիրառում է, Անկարան ստիպված է լինելու կրկին վիզային ռեժիմ մտցնել:

Աղբյուր` Ermenihaber.am