ՆԱՏՕ-ն Թուրքիայի անվտանգության համար ռազմանավեր և ինքնաթիռներ է ուղարկում Սև ծով

Միջազգային09:02, 02 Դեկտեմբեր 2015

ՆԱՏՕ-ն Թուրքիայի անվտանգության համար ռազմանավեր և ինքնաթիռներ է ուղարկում Սև ծով

Բելգիայի մայրաքաղաք Բրյուսելում տեղի ունեցող ՆԱՏՕ-ի անդամ-երկրների արտգործնախարարների ժողովից առաջ, ՆԱՏՕ-ի գլխավոր քարտուղար Յենս Ստոլտենբերգը մամուլի ասուլիսին հայտարարել է, որ մոտ ժամանակներս Սև ծով են ուղարկվելու Գերմանիայի և Դանիայի ռազմանավերը, ինչպես նաև Մեծ Բրիտանիայի ինքնաթիռները:

Ըստ թուրքական «haberler» լրատվակայքի` Ստոլտենբերգը շեշտել է, որ ռազմանավերի տեղակայումը Սև ծովում, ամենևին կապված չէ ռուս-թուրքական հարաբերություններում առաջացած լարվածության հետ, դա միան արվում Թուրքիայի անվտանգության համար:

Նավերը ծովում իրականացնելու են մարտավարական մի շարք գործողություններ: ՆԱՏՕ-ի գլխավոր քարտուղարը կոչ է արել Ռուսաստանին և Թուրքիային նվազեցնել առկա լարվածությունը, ապա ձեռնարկել համապատասխան քայլեր, որոնք կօգնեն նվազեցնել նման միջադեպերի ռիսկերը (Նկատի է ունեցել թուրքական ուժերի կողմից Սիրիայի տարածքում խոսցված ռուսական ինքնաթիռի միջադեպը):

Նա, խոսելով նախկինում Թուրքիայում տեղակայված «Patriot» զենիթահրթիռային համակարգերից, նշեել է, որ տեղի ունենալիք ժողովի ընթացքում քննարկվելու է նաև, թե այժմ ինչ տեսակ միջոցներով է ապահովվելու Թուրքիայի պաշտպանությունը:

Ստոլտենբերգը կոչ է արել ՆԱՏՕ-ի անդամ մյուս երկրներին հետևել Դանիայի, Գերմանիայի և Մեծ Բրիտանիայի օրինակին և ձեռնարկել նմանատիպ քայլեր առաջիկա մի քանի շաբաթների ընթացքում:

Հիշեցնենք, որ Թուրքիայի Գազիանթեփ (պատմ. Այնթափ) նահանգում տեղակայված ԱՄՆ-ի զինուժին պատկանող հակաօդային պաշտպանության (ՀՕՊ) «Patriot» զենիթահրթիռային համակարգերը դուրս էին բերվել Թուրքիայի 39-րդ հետևակային բրիգադի զորամասից:

Աղբյուր` Ermenihaber.am