Անկարայում փակվել է Գերմանիայի դեսպանատունը, Ստամբուլում՝ գլխավոր հյուպատոսարանը

Միջազգային13:27, 17 Մարտ 2016

Անկարայում փակվել է Գերմանիայի դեսպանատունը, Ստամբուլում՝ գլխավոր հյուպատոսարանը

Գերմանիայի արտգործնախարար Ֆրանկ-Վալտեր Շտայնմայերը Թուրքիայում իրենց դիվանագիտական ներկայացուցչությունները փակելու կապակցությամբ նախարարության շենքում արտակարգ մամուլի ասուլիս է հրավիրել: Շտայնմայերը լրագրողներին հայտնել է, որ տեղեկություններ են ստացել Թուրքիայում իրենց ներկայացուցչությունների ու դպրոցների դեմ հնարավոր լուրջ ահաբեկչական հարձակումների մասին:

Ըստ գերմանացի նախարարի` Անկարայում իրենց դեսպանատան և Ստամբուլի գլխավոր հյուպատոսության փակման որոշումն ընդունվել է այդ տեղեկությունները վերլուծելուց հետո:

Թուրքական լրատվամիջոցներն ավելի վաղ տեղեկացրել էին, որ փակված գերմանական հյուպատոսության շենքի մուտքին փակցված է հետևյալ գրությունը. «Գերմանիայի Դաշնային Հանրապետության գլխավոր հյուպատոսարանը լուրջ նախազգուշացում ստանալուց հետո փակվել է` ելնելով անվտանգության միջոցառումներից»:

Մեկ օրով փակվել է նաև Ստամբուլի գերմանական հատուկ վարժարանը, ինչ պատճառը, ըստ Գերմանիայի արտաքին գերատեսչության հայտարարության, չհաստատված նախազգուշացումն է հնարավոր ահաբեկչության մասին:

Աղբյուրը տեղեկացնում է, որ Գերմանիայի փակված հյուպատոսության շենքի մոտ գտնվող մեծ թվով ոստիկանական ծառայողներ անվտանգության արտակարգ միջոցառումներ են անցկացնում:

Նախօրեին էլ Գերմանիայի արտգործնախարարությունը «ամեն պահի սպասվող ահաբեկչության» մասին նախազգուշացնող հայտարարություն էր տարածել ուղղված Անկարայում բնակվող իր քաղաքացիներին:

Աղբյուր` Ermenihaber.am