Էրդողանը կմասնակցի ԱՄՆ-ում առաջին թուրք-իսլամական կենտրոնի բացմանը

Միջազգային10:34, 25 Մարտ 2016

Էրդողանը կմասնակցի ԱՄՆ-ում առաջին թուրք-իսլամական կենտրոնի բացմանը

Թուրքիայի նախագահ Ռեջեփ Թայիփ Էրդողանը մարտի 29-ից ապրիլի 2-ը ԱՄՆ կատարելիք այցի ժամանակ կմասնակցի «Ամերիկյան կրոնական կենտրոն» անվամբ թուրք-իսլամական կենտրոնի բացմանը:

Ըստ թուրքական «Akşam» թերթի կայքի` կենտրոնը նպատակ է ունենալու կրոնի վերաբերյալ ճիշտ և ժամանակակից տեղեկություններով իրազեկել հասարակությանը, ուղղորդել հավատքի, կրոնական արարողությունների ու բարոյականության հարցերում:

Աղբյուրը նշում է, որ «Ամերիկյան կրոնական կենտրոն»-ը մեծ համալիր է, որը ներառում է մզկիթ, մշակութային կենտրոն, համայնքի անդամների համար նախատեսված առանձին շենք, հյուրատուն և ավանդական թուրքական ոճով կառուցված տներ:

Նշվում է, որ համալիրի մզկիթը միակն է ԱՄՆ-ում, որն ունի 2 մինարեթ: Մզկիթի ներսում և բակում կարող են կրոնական արարողության մասնակցել միաժամանակ 3.000 մարդ:

Մշակույթի կենտրոնում հիմնադրվող Իսլամի հետազոտությունների կենտրոնն էլ խորհրդատվական ծառայություններ է մատուցելու ԱՄՆ սովորելու մեկնած թուրք ուսանողներին:

Աղբյուր` Ermenihaber.am