ԱՄՆ-ի ՊՆ-ն պահանջել է, որ ամերիկացի զինվորների ընտանիքները հեռանան Թուրքիայից

Միջազգային09:03, 30 Մարտ 2016

ԱՄՆ-ի ՊՆ-ն պահանջել է, որ ամերիկացի զինվորների ընտանիքները հեռանան Թուրքիայից

ԱՄՆ-ի պաշտպանության նախարարությունը Թուրքիայի ռազմաբազաներում (Ադանա, Իզմիր և Մուղլա) գտնվող ամերիկյան զինվորական անձնակազմի ընտանիքներին հորդորել է հեռանալ այդ երկրից: Համարվում է, որ այդ կերպ որոշակիորեն կնվազեն ամերիկացի զինվորների ընտանիքներին ուղղված ռիսկերը: Ըստ թուրքական «turkishny» լրատվակայքի` նման որոշման պատճառ է հանդիսացել տարածաշրջանում աճող լարվածությունը:

Տարածած համապատասխան հայտարարության մեջ ԱՄՆ-ի պաշտպանական գերատեսչությունը բարձր է գնահատել Ինջիրլիքի ռազմաօդային բազայից իրականացվող Թուրքիայի և ԱՄՆ-ի օդային համատեղ հարվածները «Իսլամական պետություն» (ԻՊ) ահաբեկչական կազմակերպության հենակետերի ուղղությամբ:

Իսկ ԱՄՆ-ի պաշտպանության նախարարության խոսնակը, տեղեկացրել է, որ Թուրքիայից հեռանալու է մոտավորապես 670 մարդ: Նա նշել է, որ այն զինվորների ընտանիքները, ովքեր դեռևս մնալու են Թուրքիայում հիմնականում բնակվում են Անկարայում և Ստամբուլում:

Աղբյուր` Ermenihaber.am