Ուկրաինայի վարչապետն ու Թուրքիայի պաշտպանության նախարարը քննարկել են երկկողմ համագործակցության հարցեր

Միջազգային07:05, 13 Մայիս 2016

Ուկրաինայի վարչապետն ու Թուրքիայի պաշտպանության նախարարը քննարկել են երկկողմ համագործակցության հարցեր

Ուկրաինայի նորանշանակ վարչապետ Վլադիմիր Գրոյսմանը և Թուրքիայի պաշտպանության նախարար Իսմեթ Յըլմազը քննարկել են երկու երկրների միջև ռազմական, առևտրական և էներգետիկ համագործակցության խնդիրները: Այս մասին տեղեկացնում է թուրքական «Timeturk.com» լրատվակայքը:

Ուկրաինայի վարչապետը նշել է, որ երկու երկրների միջև եղած համագործակցությունը որակապես ավելի է զարգացել: «Սա շատ ուրախալի է: Ես հավատում եմ, որ մենք հիմքեր ենք ստեղծել քաղաքական, տնտեսական և ռազմական ոլորտում համագործակցության ամրապնդման համար: Մենք ամրապնդում ենք մեր հարաբերությունները, ընդլայնում առևտրային կապերը, մոտենում ազատ առևտրային գոտու մասին պայմանագրի կնքմանը», - ասել է Գրոյսմանը:

Ուկրաինայի նախարարների խորհրդի տարածած հայտարարության համաձայն՝ կողմերը հատկապես քննարկել են ռազմական և առևտրային համագործակցությանը վերաբերող խնդիրներ:

Գրոյսմանը ընդգծել է, որ Ուկրաինան և Թուրքիան համագործակցության լայն հնարավորություններ ունեն, իսկ ռազմական համագործակցությունը կնպաստի Ուկրաինայի պաշտպանական հնարավորությունների զարգացմանը:

Իսկ Թուրքիայի պաշտպանության նախարար Յըլմազը նշել է, որ իրենք շարունակելու են աջակցել Ուկրաինային: Թուրք նախարարը հավելել է, որ անցյալ տարի երկու երկրների միջև առևտրի ծավալը կազմել է շուրջ 4 մլրդ դոլար:

Աղբյուր` Ermenihaber.am