Ավստրիացի գործիչ.«Թուրքիայի եվրաինտեգրման մասին խոսելը ժամանակի վատնում է»

Միջազգային11:17, 09 Սեպտեմբեր 2016

Ավստրիացի գործիչ.«Թուրքիայի եվրաինտեգրման մասին խոսելը ժամանակի վատնում է»

Ավստրիայի նախագահի թեկնածու Ալեքսանդր Վան Դեր Բելենը Թուրքիայի եվրաինտեգրման խնդրի վերաբերյալ ուշագրավ հայտարարություն է արել: Թուրքական «Hürriyet» թերթի կայքի տեղեկացմամբ՝ Բելենը մասնավորապես նշել է, որ Թուրքիա -Եվրամիություն (ԵՄ) բանակցությունները պետք է շարունակել, սակայն այս պահին Թուրքիայի ԵՄ անդամակցության մասին խոսելը ժամանակի անիմաստ վատնում է:

Ավստրիացի գործիչը տեսակետ է հայտնել, որ Թուրքիան տեսանելի ապագայում ԵՄ անդամ չի դառնա: «Իմ նախագահության ընթացքում դա միանշանակ չի լինի», - ընդգծել է Բելենը:

Քաղաքական գործիչը նշել է, որ Թուրքիան և բուֆերային դեր է կատարում Եվրոպայի և խնդրահարույց Միջին Ասիայի միջև և կշարունակի լինել Եվրամիության հարևանը: Բելենը ուշադրություն է հրավիրել այն հանգամանքի վրա, որ ոչ Թուրքիան , ոչ էլ ԵՄ-ն չեն ցանկանա ռիսկի ենթարկել առկա տնտեսական հարաբերությունները:

Հավելենք, որ Ավստրիայում նախագահական ընտրությունները նախատեսված են հոկտեմբերի 2-ին: Թեկնածուներն են «Ազատություն» կուսակցության ներկայացուցիչ Նոբերթ Հոֆերը և «Կանաչների» կուսակցության ներկայացուցիչ Ալեքսանդր Վան դեր Բելենը:

Աղբյուր` Ermenihaber.am