Պուտինի ելույթը Ստամբուլի էներգետիկ համաժողովում

Միջազգային13:39, 10 Հոկտեմբեր 2016

Պուտինի ելույթը Ստամբուլի էներգետիկ համաժողովում

Հոկտեմբերի 10-ին Ստամբուլում մեկնարկել է 23-րդ Միջազգային էներգետիկ համաժողովը, որին ներկա է նաև Ռուսաստանի նախագահ Վլադիմիր Պուտինը: Թուրքական «Haberler» լրատվակայքի տեղեկացմամբ՝ համաժողովում ելույթ ունեցած Պուտինը անդրադարձել է հուլիսի 15-ի ձախողված հեղաշրջման փորձին և «Թուրքական հոսք» նախագծի կյանքի կոչման հեռանկարներին:

Ռուսաստանի նախագահը նշել է, որ բենզինի և բնական գազի արտադրության ծավալները հետզհետե մեծանում են, միաժամանակ մեծանում է նաև դրանց նկատմամբ բնակչության պահանջարկը:

Պուտինը շեշտել է բենզինի արտադրության ոլորտում կայունություն ապահովելու անհրաժեշտությունը և նշել, որ պետք է պայմաններ ստեղծել ազատ առևտրի և արդար մրցակցության համար:

«Էներգետիկայի ոլորտում սահմանափակումներ անընդունելի են: Մենք պետք է էներգիայի տեղափոխման առումով ապահով լինենք:

Մենք ներդրումներ ենք կատարում էներգիայի նոր աղբյուրների որոնման և բացահայտման համար, ներդրումներ ենք կատարում նաև արդյունահանման գործում, որքան էլ որ պայմանները դժվարին լինեն: Մենք ցանկանում ենք նաև կյանքի կոչել «Թուրքական հոսք» նախագիծը»-,- ասել է Ռուսաստանի նախագահը:

Անդրադառնալով նաև ձախողված հեղաշրջման փորձին՝ Վլադիմիր Պուտինը շնորհավորել է թուրք ժողովրդին:

Միջազգային էներգետիկ համաժողովը կշարունակվի մինչև հոկտեմբերի 13-ը: