Թուրք-իսրայելական հարաբերությունները վերականգնվում են

Միջազգային08:56, 14 Հոկտեմբեր 2016

Թուրք-իսրայելական հարաբերությունները վերականգնվում են

Թուրքիայի և Իսրայելի միջև կարգավորման գործընթացը շարունակվում է: «Deutsche Welle»-ի թուրքական ծառայության տեղեկացմամբ՝ թուրքական կողմը հայտարարել է, որ երկկողմ հարաբերությունները այսուհետև կշարունակվեն նաև դեսպանների մակարդակով:

Նախագահ Էրդողանի մամուլի խոսնակ Իբրահիմ Քալընը հայտարարել է, որ Անկարայում արդեն հստակեցվել է Իսրայելում Թուրքիայի դեսպանի անունը: «Կարող եմ ասել, որ այս գործընթացն արդեն ավարտվել է: Երբ ժամանակը գա, արտգործնախարարությունը թեմայի վերաբերյալ անհրաժեշտ հայտարարությունը կանի: Կարծում եմ, որ մեկ շաբաթվա կամ 10 օրվա ընթացքում երկու երկրներից դեսպանների նշանակման գործընթացը կավարտվի», - նշել է Քալընը:

Նշենք, որ Իսրայելի էներգետիկայի նախարար Յուվալ Շտայնցը հոկտեմբերի 13-ին այցելել է Ստամբուլ՝ մասնակցելու 23-րդ համաշխարհային էներգետիկ համաժողովին: Իսրայելցի նախարարը հանդիպում է ունեցել թուրք պաշտոնակից Բերաթ Ալբայրաքի հետ, քննարկվել են երկկողմ հարաբերությունների զարգացմանը վերաբերող խնդիրներ:

Հիշեցնենք, որ թուրք-իսրայելական հարաբերությունները սրվել էին 2010թ. մայիսի 31-ի «Մավի Մարամարա»-ի միջադեպից հետո: Թուրքական նավի վրա հարձակված իսրայելցի զինվորների հետ բախման արդյունքում Թուրքիայի 9 քաղաքացի էր զոհվել:

Աղբյուր` Ermenihaber.am