ՆԱՏՕ-ի բազայում ծառայող թուրք զինվորականները քաղաքական ապաստան են խնդրել Գերմանիայից

Միջազգային10:13, 17 Նոյեմբեր 2016

ՆԱՏՕ-ի բազայում ծառայող թուրք զինվորականները քաղաքական ապաստան են խնդրել Գերմանիայից

Գերմանիայի Ռայնլանդ Պֆալց (Rheinland-Pfalz) նահանգի Կայզերսլաութեն քաղաքի մոտակայքում գտնվող ՆԱՏՕ-ի ռազմաբազայում ծառայող թուրք զինվորականները դիմել են Գերմանիայից քաղաքական ապաստան ստանալու խնդրանքով:

Ըստ թուրքական «Hurriyet» թերթի կայքի` Կայզերսլաութենի տեղական իշխանությունները հաստատել են թուրք զինվորականների դիմումների մասին լուրերը:

Անձնական տվյալների գաղտնիությունը չխախտելու սկզբունքից ելնելով` չի հրապարակվում, թե քանի թուրք զինվորական է նման դիմում ներկայացրել:

Կայզերսլաութենի քաղաքային իշխանության ներկայացուցիչներից մեկը հարցազրույց տալով գերմանական «SVR» լրատվական գործակալությանը, հայտնել է, որ այդ դիմումներն ուսումնասիրվում են միգրացիայի դաշնային ծառայություն կողմից:

Թուրք զինվորականները քաղաքական ապաստան խնդրելու համար որպես հիմնավորում են ներկայացնել հուլիսի 15-ի հեղաշրջման փորձից հետո Թուրքիայում ստեղծված քաղաքական իրավիճակը:

Նշվում է, որ Գերմանիայում գտնվող ՆԱՏՕ-ի ռազմաբազայում ծառայություն են իրականացնում 30-40 թուրք զինվորականներ, որոնց գործուղման ժամկետը մոտենում է ավարտին:

Աղբյուր` Ermenihaber.am