Մաքսային միությունը՝ որպես այլընտրանք Թուրքիայի եվրաինտեգրմանը

Միջազգային13:57, 30 Նոյեմբեր 2016

Մաքսային միությունը՝ որպես այլընտրանք Թուրքիայի եվրաինտեգրմանը

Եվրախորհրդարանի փոխնախագահ Ալեքսանդր Լաբսդորֆը հայտարարել է, որ Մաքսային միությունը Թուրքիայի համար կարող է եվրաինտեգրման այլընտրանք լինել:

Թուրքական «Doğan» լրատվական գործակալության համաձայն՝ Լաբսդորֆը նշել է, որ այդ կերպ հնարավոր կլինի խուսափել բանակցությունների դադարեցման պատճառով կողմերի միջև լարվածության առաջացումից:

Ըստ աղբյուրի՝ եվրահանձաժողովը Մաքսային միության ընդլայնման նպատակով հատուկ նախագիծ է նախապատրաստում, որը քնարկման կդրվի 2017թ. գարնանը:

Կանխատեսումների համաձայն՝ Մաքսային միության ընդլայնման դեպքում Թուրքիան կարող է Եվրամիության երկրներ արտահանել 95 տոկոսով ավելի շատ գյուղատնտեսական ապրանքներ և 430 տոկոսով ավելի շատ ծառայություններ: Դրա շնորհիվ Թուրքիայի ներքին համախառն արդյունքը կավելանա 1.8 տոկոսով:

Իսկ եվրախորհրդարանի արտաքին հարաբերությունների հանձնաժողովի նախագահ Էլմար Բրոկն առաջարկել է Թուրքիա-ԵՄ բանակցությունները դադարեցնելու փոխարեն նախապատվությունը տալ «Նորվեգական մոդելին»:

Նշենք, որ Նորվեգիան ԵՄ անդամ չէ, սակայն ընդգրկված է Եվրոպայի տնտեսական համայնքում (EEA):

Աղբյուր` Ermenihaber.am