Թուրքիան փորձում է Ռուսաստանից գնել S-400 ՀՕՊ համակարգեր

Միջազգային07:18, 25 Հունվար 2017

Թուրքիան փորձում է Ռուսաստանից գնել S-400 ՀՕՊ համակարգեր

Թուրքիան Ռուսաստանի հետ քննարկում է S-400 հակաօդային պաշտպանական համակարգեր ձեռք բերելու հարցը: Թուրքական «Milliyet» թերթի կայքի տեղեկացմամբ՝ այս թեման օրակարգային էր դարձել նախագահներ Ռեջեփ Թայիփ Էրդողանի և Վլադիմիր Պուտինի ստամբուլյան հանդիպման ժամանակ:

Այդ ժամանակ կողմերը համաձայնություն էին ձեռք բերել երկու երկրների միջև ռազմական արդյունաբերության ոլորտում համագործակցել:

Եթե S-400 համակարգերի վաճառքի շուրջ համաձայնություն ձեռք բերվի, ապա դրանից հետո Ռուսաստանը և Թուրքիան կհամագործակցեն պաշտպանական նոր համակարգի մշակման գործում:

Աղբյուրը նշում է, որ Ռուսաստանը դրական է տրամադրված Թուրքիային S-400 հակաօդային պաշտպանական համակարգեր վաճառելու հարցում: Սակայն ներկայումս ռուսական բանակը դեռևս լիովին ապահովված չէ այդ համակարգերով: Ուստի սեփական բանակը զինելու խնդիրը, բնականաբար, առաջնային է Ռուսաստանի համար:

Մյուս կողմից էլ Թուրքիան շահագրգռված է հնարավորինս արագ համաձայնության գալ հակաօդային պաշտպանության նշյալ համակարգերի ձեռքբերման շուրջ: Հավելենք, որ Թուրքիան ավելի վաղ այս խնդրի վերաբերյալ պայմանավորվածություններ է ձեռք բերել նաև Չինաստանի և Հնդկաստանի հետ:

Աղբյուր` Ermenihaber.am