Թուրքիան և Իսրայելը Անկարայում քաղաքական խորհրդակցություն կանցկացնեն

Միջազգային09:58, 31 Հունվար 2017

Թուրքիան և Իսրայելը Անկարայում քաղաքական խորհրդակցություն կանցկացնեն

Թուրք-իսրայելական կարգավորման գործընթացը շարունակվում է: 2010թ. հետո առաջին անգամ կողմերի միջև քաղաքական խորհրդակցություն կանցկացվի: Թուրքական «Milliyet» թերթի կայքի տեղեկացմամբ՝ խորհրդակցությունը տեղի կունենա փետրվարի 1-ին՝ Անկարայում:

Հանդիպումը կգլխավորեն Թուրքիայի արտգործնախարարության (ԱԳՆ) խորհրդական Ումիթ Յալչընը և Իսրայելի ԱԳՆ գլխավոր տնօրեն Յուվալ Ռոթեմը:

Քաղաքական խորհրդակցությամբ նպատակ է դրված զարգացնելու բազմակողմ հարաբերությունները և ավելի հաճախակի դարձնել փոխադարձ այցերը: Այս համատեքստում հաջորդ շաբաթ նախատեսվում է թուրք նախարարներից մեկի այցը Իսրայել:

Հիշեցնենք, որ 2010թ. մայիսի 31-ին իսրայելցի զինվորները հարձակվել էին Գազայի տարածք ուղարկվող հումանիտար օգնությունը տեղափոխող «Mavi Marmara» նավի վրա: Բախման հետևանքով սպանվել էր 9 թուրք քաղաքացի, ծանր վիրավորում ստացած ևս մեկ քաղաքացի մահացել էր ավելի ուշ: Դեպքը երկու երկրների միջև հարաբերությունների վատթարացման պատճառ հանդիսացավ:

Միայն այն բանից հետո, երբ Իսրայելը համաձայնեց ներողություն խնդրել, փոխհատւցում վճարել զոհվածների ընտանիքներին և վերականգնել դեպի Գազա մարդասիրական օգնության փոխադրումները, հնարավոր դարձավ կարգավորել Թուրքիայի հետ հարաբերությունները: Երկկողմ բանակցությունների շրջանակներում գրանցված վերջին զարգացումը Թուրքիայում և Իսրայելի երկու երկրների դեսպանների նշանակումն էր: