Ալբանացի դիվանագետ. «Թուրքիան մեր դաշնակիցն ու ռազմավարական գործընկերն է Բալկաններում»

Միջազգային12:26, 06 Փետրվար 2017

Ալբանացի դիվանագետ. «Թուրքիան մեր դաշնակիցն ու ռազմավարական գործընկերն է Բալկաններում»

ՄԱԿ-ում Ալբանիայի նախկին ներկայացուցիչ Աբդի Բալեթան խոսել է թուրք-ալբանական հարաբերությունների, Բալկաններում Թուրքիայի ազդեցության, ինչպես նաև գյուլենականների դեմ պայքարի մասին:

Ըստ «Turkiyegazetesi» թերթի կայքի՝ նա նշել է, որ այժմ Ալբանիայի համար Բալկաններում որպես դաշնակից և ռազմավարական գործընկեր հանդիսանում է Թուրքիան: Եվրոպայում Ալբանիայի դաշնակիցը Գերմանիան է, իսկ ամբողջ աշխարհում՝ ԱՄՆ-ն:

Բալեթան նշել է, որ Թուրքիայում 2016թ. հուլիսի 15-ին իրականացված ռազմական հեղաշրջման փորձից հետո շատ բան է փոխվել: Մասնավորապես փոխվել են Թուրքիայի հայացքները քաղաքականության և տնտեսության նկատմամբ: Եվ այդ առումով այժմ մեծ տարբերություն կա «հին և նոր Թուրքիաների միջև»:

Անդրադառնալով Թուրքիայի նախագահ Ռեջեփ Թայիփ Էրդողանին և վերջինիս վարած քաղաքականությանը՝ ասել է.

«Այսօր նա է Թուրքիան և նա է ներկայացնում այդ երկիրը: Նա գիտի, թե ինչն է այդ երկրի համար լավ»:

Խոսելով հուլիսի 15-ից հետո Թուրքիայի ներսում Էրդողանի վարած քաղաքականությունից, ՄԱԿ-ում Ալբանիայի նախկին ներկայացուցիչը ասել է. «Եթե Էրդողանն այս գործընթացը ավարտին հասցնի և ամբողջապես պայքարի, նա ինձ համար Աթաթուրքից հետո Թուրքիայի ամենաուժեղ դեմքը կմնա»:

Աղբյուր` Ermenihaber.am